Jurgen Klopp a nui ve leh ta

Tun hnaia an result avanga hlim hleithei lo Liverpool fan-ten hlimna tur an nei ve leh ta a, coach Jurgen Klopp pawh hlim takin a nui ve leh ta - FA Cup third round replay-ah an chak.

Liverpool hian Thawhlehni zan khan an mikhualna ramah Wolverhampton Wanderers chu 1-0 in an hneh a, Harvey Elliott chuan Liverpool tana goal awmchhun khungin FA Cup fourth round an lut.

Klopp chuan, "Khatiang taka khel ṭha a, hnehna kan chan kha chu hun rei tak liam tawh ami ang mai kha a ni," a ti a, goal khat chauhin chak mah se an khelh danah a lawm hle.

Liverpool hian Inrinni zan dar 6:00-ah Premier League match khel turin Chelsea an mikhual dawn a, Reds tan chuan inkhel hautak hmachhawn hmaa hnehna chan hi duhthusam a ni.

Thim ata êngah...
World Cup zawh hnua an match hmasa berah Liverpool-in 3-2 in League Cup-ah Manchester City an ngam lo a, hei hi chu la hriatthiam theih a ni - league-ah Aston Villa leh Leicester City a zawnin an hneh zui a, khel ṭha lo mah se point thum an hlawhchhuah avangin fans an phun lo.

Mahse, season hmang ṭha lo tak Liverpool an chesual zui a, Brentford (3-1) lakah an tlawm a, Wolves (2-2) an inhnehtawkpui a, Brighton & Hove Albion (3-0) lakah dawl zawrin an zawr bawk.

Fans thin a rim a, an coach ngainat em em Jurgen Klopp dinhmun thlengin sawi rik a ni - mahse, a hunah tak Liverpool an chak leh ta a, an beidawn vanglai takin beiseina êng chu an tan hmuh theihin chhawp a ni leh ta.

Minute 13-na lekah Thiago Alcantara chuan Elliott chu ball a pe a, English winger hian ṭha zeta a tlan luhpui hnuah yard 30 vel aṭangin a khung a, goal mawi bik a ni.

Liverpool tak tak
Klopp-a'n Brighton laka tlawm team aṭangin player pariat ngawt a thlak danglam a, Reds B team zawk anga chhal theih ni mah se an khel a hmuhnawm a, hmanni lawka Klopp-a'n a hlawhtlinpui em em Liverpool team kha kan hmu leh ta.

Ball an hlohin rang takin an um zui a, an goal bawh a na a, player-te an thawkrim a, an hmuhnawm takzet - Fabio Carvalho-a goal khung pawmsak a ni lo a, bench aṭanga luhtir Curtis Jones chuan a hun ṭha neih a chhawr bik lo.

Wolves hi chance nei lo tawp an ni bik lo. Adama Traore, Ruben Neves, Raúl Jiménez leh Matheus Cunha ten an chance neih duhawm an chhawr lo vek a, a tawpah chak phu zawk Liverpool an chak.

Julen Lopetegui enkawlna hnuaiah Wolves-in hma an sawn tih a lang a, Spanish coach chuan, "Liverpool tum hi chu a awlsam ngai lo a, mahse, kha aia result ṭha zawk kha second half-ah khan kan phu a ni. Chance mai ni loin, khung ngeina tur vawi hnih, vawi thum kan nei a ni," tiin a sawi.

A tawpah khan a harsa deuh a, mahse, hun rei zawk kha inkhel kan thunun a ni. Kan khel ṭha a, kha kha chak loh hnua khelh dan tura kan duh chu a ni.
Man of the match nih phu ringawt pawh kan player zingah an awm nual a, first half kan khel ṭha hle. Second half-ah khelh ṭhat lai kan nei a, a tawpah chuan goal khungtir loh tumin kan khel thung.
- Jurgen Klopp, Liverpool boss