Man United lei tum zingah Sir Ratcliffe a tel

Glazer chhungkuain Manchester United hralh an phal a, Raine Group-in English club hralh chungchang hi an buaipui. British sumdawng hausa Sir Jim Ratcliffe hian a naupan lai aṭanga a club ṭan Man United lei a tum tihnemngheh nan Raine Group hnuaiah a inziaklut.

November thla khan Glazers chuan Man United chungchangah ngaihtuahna thar an sen tur thu thuchhuah an siam a, hralh turin thulukna an siam. Nikum October thla khan Ratcliffe hian United hi nipuia hralh an tum a nih phawt chuan lei a tum tur thu a lo sawi tawh a ni.

British sumdawng hausa Ratcliffe hian nikum khan Chelsea pawh lei a tum a, amaherawhchu London club hi Todd Boehly leh Clearlake Capital hnenah an hralh ta zawk. Ratcliffe aiawha thupuangtu chuan, "Dan angin Man United lei tumin kan inziaklut," tiin Man United lei an thum thu an tichiang.

Kum 70 mi Ratcliffe hi Britain-a hausa ber a ni a, Man United a ṭan thu leh lei a châk thu hi a zep lo. Nikum October thla khan Ratcliffe chuan, "Manchester United ṭantu kumhlun ka ni a, kum 1999-a Barcelona-a match danglam bik thlen ṭum pawh khan a hmunah ka thlir a, thinlung takin min khawih a ni.

"Manchester United hi Glazer chhungkaw ta a ni a, Joel leh Avram te pawh ka hmu tawh a, mi ṭha tak an ni. Hralh an tum lo. Nipuia hralh an tum a nih chuan lei ka tum ngei ang. Mahse, an hralh hun nghah ringawt kha a dik loh avangin Chelsea lei ka tum a ni," tiin a lo sawi tawh.

Erik Ten Hag-a hnuaiah Man United an che ṭha chho a, club hlutna pawh a sang leh sawt dawn. Saudia Arabia sports minister Prince Abdulaziz bin Turki Al-Faisal pawhin Man United lei an duh thu a lo sawi tawh a ni.

Tu nge Ratcliffe?
British sumdawng hausa Sir Jim Ratcliffe hi infiamna lama tui mi a ni a, tunah hian French Ligue 1 club Nice, Swiss club Lausanne-Sport leh Ineos Grenadiers cycling team a nei mek a, a company Ineos chu Formula 1 team Mercedes nen an thawk dun mek bawk. Nice hi nipui transfer-a Arsenal midfielder hlui Aaron Ramsey leh Leicester City keeper Kasper Schmeichel laluttu club-te kha an ni.

Lancashire-a piang, chemical group Ineos-a share ngah ber hian May thla khan Chelsea chu £4.25tld-in lei a lo tum tawh a, mahse, a hlawhchham. Hetihlai hian United lei a tum loh chhan an zawh chuan, "An zuar miau lo alawm," a ti!

Hetihlai hian Ratcliffe hian Manchester United fan a la nih reng thu a sawi a, United fans tam zawk chuan Glazer chhungkua aiin an duh ang tih a chiang - a leina tur sum pawh a nei. March 2022-a an account-a a lan danin United hian leiba £495.7mtd an la nei mek tih hriat a ṭha a, club hmangaihtu neitu an nei a nih chuan khelmual chhunga hma an sawn mekna kawngah hian hmalam an pan zel thei ang.