Copa del Rey: Barcelona leh Real inlan zan a thleng

Spanish Super Cup champion hlim Barcelona chuan nomawi an chawi hnua an match hmasa ber chu zanin dar 12:30 hian an khel dawn a, Copa del Rey round of 16-ah AD Ceuta an lenchilh dawn.

Super Cup final-a Barcelona ngam lo hlim Real Madrid chu zanin dar 1:30-ah an inlan dawn bawk a, Carlo Ancelotti enkawl team tan erawh kalkawng a awlsam dawn lo.

Real hian La Liga club ṭha Villarreal an lenchilh dawn - nizan khan Copa del Rey round of 16 inkhel pali a awm a, he thu buatsaih a nih lai hian result kan hre hman lo thung.

Thawhlehni zanah inkhel pahnih a awm bawk a, Real Sociedad chuan Robert Navarro goal khung hmangin Real Mallorca chu 1-0 in an hneh a, Sevilla chuan Ivan Rakitic goal hmangin 1-0 in Alaves an hneh bawk - quarterfinal an lut ve ve.

Champion team Barca
Xavi enkawlna hnuaiah a vawi khat nan Barcelona an champion a, Spanish Super Cup final-ah an hmelma kumhlun Real Madrid chu 3-1 ngawtin an hneh - an boruak fuh lai tak a ni.

Hei chauh a ni lo. Barcelona hian La Liga-ah match 16 khel tawhin hma an hruai mek bawk a, an hnuai chiaha awm Real Madrid aia an sanna chu point thum a ni mek.

Mahse, Barca hian Champions League group stage paltlang zo loin, Europa League lamah an tla thla a, an tan chuan Spanish football-a nomawi chawi theih zawng zawng chawi a ṭul.

Spanish Super Cup an la tawh a, La Liga-ah hma an hruai mek a, Copa del Rey an beisei bawk - mahse, zaninah chak phawt an mamawh a, Spanish third division club AD Ceuta lakah harsatna tawk lo tura beisei an ni.

Inlan tur
Barcelona hian kartawpah La Liga match khelh tur an neih lehnghal dawn avangin, Xavi tan neih ṭhat ber thawhchhuahpui hun niin a lang lo a, Spanish Super Cup final khel aṭanga squad a siksawi a nih pawhin a mak hran lo ang.

Chutihrual chuan striker chhuanvawr Robert Lewandowski erawh inlan thei dinhmunah a ding - Polish striker hian league-ah hrem vangin match hnih a la khel thei lo a, Xavi tan a striker ṭha mi hi 'khek' hahdam a ngai lo.

Hetihlai hian Ferran Torres pawhin hrem vang thoin match hnih a khel dawn lo a, Cueta lakah a chhawr theih dawn tihna a ni. Hetihlai hian Gavi leh Pedri te erawh chawlh hahdamtir an nih a rinawm.

He Barca team hi an ṭhat dan bera an inlan lo a nih pawhin Ceuta hneh tur khawp chuan an ṭha tawk a, thilmak danglam a thleng a nih ngawt loh chuan Barca hi chak ngei tura ngaih an ni.

Real beiseina
Spanish Super Cup-ah hmelma kumhlun Barcelona an ngam lo a, Real tan chuan 'na' tak a ni - zaninah Copa del Rey last 16 an khel zui dawn a, team ṭha Villarreal an hmachhawn dawn avangin rilru na thawidam a harsa mai thei!

Villarreal hian October thla tawp lamah an coach duhlai Unai Emery chu Aston Villa lakah an chân a, league match hnih an tlawm zui. Mahse, Villarreal an mutthlu rei lo - a hnu league match liah vawi thum an chak a, vawi khat draw an nei.

Hriat tel atana ṭha chu an hneh zingah hian Real Madrid an tel - thlatir khan league match-ah team pahnih hi an intawng a, Villarreal chuan an mikhual hi 2-1 in an lo hneh a, kut ruakin Real an haw.

Zanina team pahnih intawnna tur pawh hi Estadio de la Cerámica, Villarreal khelmual tho kha a ni a, La Liga-ah pawh an hneh tawh hnu team hi an hlau thar thut lo ang.

Real an buai
Villarreal an lenchilh hmain Real-in chanchin lawmawm lo an hria a, right back Dani Carvajal chu tihrawl hliam vangin a inlan thei lo mai thei - chuti a nih chuan Eder Militao emaw Nacho Fernandez emawten bul an ṭan a ṭul ang.

Carvajal bakah hian Lucas Vazquez, Aurelien Tchouameni leh David Alaba te an inhliam bawk a, Real-in an damdawi in lun vanglai an tawng mek.

Spanish Super Cup-a bul ṭan lo Rodrygo leh Marco Asensio ten bul an ṭan a rinawm a, Carlo Ancelotti tan player hahdamtir châkawm viau mah se team ṭha an hmachhawn dawn miau avangin ngaihtuahna a buai hlein a rinawm.

Real tan si ban nghak turin second choice Andriy Lunin pawh a rintlak a, mahse, Ancelotti-a'n a hlauhthawngin a rinawm a, Thibaut Courtois a rawn lut thut a nih pawhin a mak hran lo ang - tlarhmaah Karim Benzema pawh bul ṭan tura beisei a ni a, Vinicius Jr. leh Rodrygo ten an thlawp chuan quarterfinal an lut a nih pawhin thil mak a ni dawn lo.