Chinese Grand Prix thlakna awm dawn lo

Car intlansiakna sang ber Formula 1 tun season hman dan tur tih chian a ni ta. Hripui leng vanga buai mek China ramah Chinese Grand Prix tlan theih a ni dawn lo a, inelna hi awm dawn lo mah se a aiawha tur ruat a ni dawn lo.

Nikum December thla khan Chinese Grand Prix awm loh tur thu hi tih chian a ni tawh. Mahse, Chinese lam thuneitu lamin intlansiak hi a aiawh siam emaw, a hun tih danglam emaw dil a ni a, an dilna erawh a remchang dawn ta lo tih tun hnai khan a chiang thung.

China hian an ram chhungah Covid 19 kai awm miah lo turin hma an la mek a, hei vang hian ram dang aṭanga tlawh pawh an harsa. F1 mai bakah hian khawvel huap tournament an thlen tur ṭhenkhat pawh ṭhulh a awm nual.

F1 chuan thuchhuah siamin, "Formula 1 chuan kum 2023 chhung atan intlansiak 23 a awm dawn tih kan sawi chiang. Nikum kum tawp lama calendar kan lo siam tawh chu tih danglam a ni lo ang," tiin an sawi.

Tun season-ah Chinese Grand Prix a awm lo a nih chuan, kum 2019 hnu lamah China ram hian Formula 1 intlansiak a la thleng leh dawn lo tihna a ni. Chinese GP a awm loh chuan - Australian Grand Prix leh Azerbaijan inkarah chawlhkar li hun awl a awm ang.

Formula 1 season thar hi March thla tirah ṭan a ni dawn a, a bul ṭan nan Bahrain Grand Prix an tlan ang. November 26-ah a hnu khar nan Abu Dhabi an tlan thung dawn a ni.