Coppa Italia aṭangin Napoli an tla

Serie A hmahruaitu Napoli an che fuh reng thei bik lo. League hmahruaitu hian Coppa Italia last 16-ah table mawngphah a awm Cremonese an hmachhawn a, hun pangngaia an inhnehtawk hnuin penalty shootout-ah Naples club 5-4 in an chak lo.

Mikhual Cremonese hi Serie A mawngphah luahtu an ni a, an hmachhawn hi a chung bera mi an ni thung. Cup inelna a nih avang erawh chuan in zuam sual theih tak a ni, mikhual team lamin Charles Pickel hmangin minute 18-na lekah hma an hruai.

Napoli an harh nghal, chawlhlawk hmain Juan Jesus hmanga an sut bakah Giovanni Simeone chuan hma an hruai nan a khung belh, second half-ah engzat tak khung belh ang maw tih chu fans lam ngaihtuah a ni chhunzawm.

Mahse, Cremonese lamin ngaihdan dang an lo nei. An goal an venghim tlat a, an chhuah belh duh tawh loh bakah hun tawp hma minute 10 chauh awm tawhah Felix Afena-Gyan hmangin an sut zo a, 2-2 in hun pangngai a tawp.

Extra time khelh zui niin, minute 100-naah Cremonese defender Leonardo Sernicol chu hnawhchhuah a ni a, hun tawp lam minute 10 chhung tlem zawk ni chungin an khel hial, mahse penalty shootout-ah 5-4 in an chak daih, penalty pettu zawngin an khung vek tihna a ni.

Serie A-ah chuan Cremonese hian tun season bikah chak ni hmel an la hmu miah lo. Napoli erawh point kua zeta hmahruai fal thei an ni a, season hmang ṭha viau mah se Luciano Spalletti naute tan inelna zawng zawng thunun vek theih a ni lo.