Mumbai khelmualah Highlander

Tun season Indian Super League-ah Lallianzuala Chhangte hmingin sawi a hlawh a, Mizo forward hi a 'form' takzet - zanin dar 7:30-ah NorthEast United an lo mikhual dawn a, goal khung leh a tum ang.

Lianzuala hian tun season ISL-ah goal riat a khung tawh a, assist vawi thum a nei bawk - ani aia goal khung hnem chu East Bengal striker Cleiton Silva (9 goals) chauh a awm a, Mizo forward hian khum a châk ang.

A tlan chak leh chet ran em avanga 'Mizo Flash' hming lem an pek Lianzuala hian top scorer nih lam a ngaihtuah loh thu Vanglaini hnenah a lo sawi tawh a, mahse, a team chakpui nana goal khung erawh engtiklai pawhin a châk dawn tih a chiang.

Highlander-in chak an duh chuan Lunglei FC forward hlui hi an ven uluk a ṭul dawn a, Maharashtra club hian Lalengmawia Ralte (Apuia) an kawl tel bawk.

NorthEast United hian an league match hnuhnung berah FC Goa hmachhawnin point an hlawh chhuak ve hram a, a hma match 13 aṭanga point thum chauh nei team tan chuan result ṭha a ni - an insiamṭha dawn chauh a, tlawm la nei lo Mumbai an lenchilh dawn!

Guwahati club hian Mizo player an kawl nual a, tun season-a match 10 khel tawh defender Joe Zoherliana, match kua khel tawh midfielder Emanuel Lalchhanchhuaha leh match 12-a goal hnih khungtu Rochharzela te an nei a, hliam vanga rei tak a chawlh hnuah R. Laldanmawia pawh match hnihah bench aṭangin a lut ve leh tawh bawk.