Zanin aṭangin Bundesliga an ṭan leh dawn ta RB Leipzig Vs Bayern Munich

Zanin dar 1:00 hian Red Bull Arena Leipzig-ah RB Leipzig-in Bundesliga champion lai Bayern Munich an mikhual dawn. World Cup hmain match 15 khelh hman a ni a, Bayern hian point 34 hmuin pakhatnaah an awm mek a, RB Leipzig hi pathumnaah awmin point 28 an hmu thung.

Bundesliga-ah hian team 18 an awm a, Europe League sang dangte aia pahnih ngawta an tlem avangin chawlh hun pawh an nei rei thei zawk. German club-te thla khat chuang hret an chawlh hnuah an inlan dawn a, inelna hmachhawn turin an inpeih khawp ang.

Record nei ṭha

Bayern hian Leipzig lakah record an nei ṭha, season liam ta khan zanina an inkhelhna tur Red Bull Arena-ah hian 4-1 in an sawp. Allianz Arena-ah pawh Bayern thoin hnehna an chang a, 3-2 in hnehna an chang.

Season liam ta khan Leipzig hi DFB-Pokal-ah an champion a, tun season ṭan nan DFL Supercup-ah Bundesliga champion leh German Cup champion te hi an inkhel a, Bavarians hi 5-3 in an chak. Bavarians tan hian player thar Sadio Mane-a'n goal a khung nghal bakah Jamal Musiala leh Benjamin Pavard ten goal khat ve ve an khung a, Leroy Sane-a'n goal hnih a khung bawk.

Leipzig ṭha zawk

RB Leipzig hian DFL Supercup-a Bayern an hneh loh ṭum hian Domenico Tedesco hoin an khel a, season bul pawh an ṭan ṭha lo. Hemi a nih avang hian September thlatir khan Tedesco an ban a, German football-a tawnhriart nei ṭha Marco Rose an lalut.

Rose hnuaiah Leipzig an par a, match hnuhnung pariatah hneh loh an tawng tawh lo a, match li chhung an chak zawn tawh bawk. Leipzig hian Bayern harsatna siam turin player ṭha pawh an kawl a; Chelsea zawm tur Christopher Nkunku, Sweden forwad Emil Forsberg, Spain forward Dani Olmo, Hungary midfielder Dominik Szoboszlai leh Portugal forward André Silva te an awm.

Tlarhnungah Croatia innghahna Josko Gvardiol bakah Germany international David Raum, Lukas Klostermann leh Marcel Halstenberg te an ni hlawm. Amaherawhchu inhiam vanga World Cup khel thei lo Timo Werner dinhmun a la chiang lo.

Bayern nge nge

Bayern Munich-in Bundesliga atana inpuahchah nan RB Salzburg an hmachhawn a, 4-4 in an inhnehtawk. Bavarians hian kil tinah player ṭha kawl mah se an tlarhnung hi a phui tawk lo a, Bundesliga-a champion tur chuan ṭha tawk tho mah se Champions League champion tur chuan an insiamṭhat ran a ṭul.

Thlasik chawlh laiin captain Manuel Neuer a inhliam a, tun season-ah a inlan thei dawn tawh lo. Amaherawhchu Germany no. 1 Neuer-a awm lo hi Bayern ropuizia tilangtu a ni a, Bavarians hian captain thlak nan an elpui Borussia Mönchengladbach goalkeeper Yann Sommer chu an la hmak.

Sommer hi zanina Leipzig an hmachhawn hunah a inlan hman a rinawm lo a, kum 34 mi Sven Ulreich-a'n mawhphurhna a lak a rinawm. Chutihrualin inhliam vanga World Cup khel thei lo Mane a la inlan thei dawn lo a, Senegalese forward tel loin Bayern an khelh a ṭul bawk ang.