Zverev leh Ruud an tla

Australian Open champion thei tura rinkai zinga mi Alexander Zverev leh Casper Ruud te chu nimin khan second round-ah an tla. Anni pahnih hma hian Rafael Nadal pawh a match hnihnaah a lo tlawm tawh bawk.

A match hmasa berah Alexander Zverev a chak hram a, second round-ah chuan khel ṭha deuh zawk tura beisei ni mah se player hriat hlawh lo Michael Mmoh lakah 6-7 (1/7), 6-4, 6-3, 6-2 in a chak lo.

French Open 2022 semifinal-ah hliam na tak a tuar a, dam tawh mah se ngai a la awh leh thei lo. Mmoh lakah vawi 58 teh meuh unforced errors a nei a, a service pawh vawi riat ngawt a hloh bawk avangin a khel ṭha lo tih a chiang.

Zverev hnehtu Mmoh hi world number 107-na a ni a, hnehna a chan hnuah tennis a khelh chhunga a match khelh ṭhat ber a nih thu a sawi hial. A match lehpekah chuan seeded 23-na Diego Schwartzman hnehtu JJ Wolf a hmachhawn leh dawn a ni.

Inkhel dangah Casper Ruud pawhin Jenson Brooksby chu 6-3, 7-5, 6-7 (4/7), 6-2 in a hneh lo. Ruud hi seeded pahnihna a ni phak a, a hneh loh tak Brooksby hi world number 39 a ni thung - an inkar a zau hle.

Norway tlangval Ruud chuan, "Theihtawp tak meuh chu ka chhuah, mahse a bik takin set lina kan khelh lai khan ka tidik hleithei lo. Tuna ka chak lohna aṭang hian thil tam tak ka zir chhuak," tiin a sawi.

Season hmasa khan Ruud hian French Open leh US Open final a lut, amaherawhchu nomawi inchuhna inkhelah a chak lo zawkah a ṭang ve ve. Tun season Grand Slam hmasa berah beisei a phak lo a, clay court inelna lianah chet ṭhat a tum ang.