Wout Weghorst hliah khuhtu Vieira naute

Arsenal legend Patrick Vieira chuan a club hlui Gunners tan hna ṭha tak a thawk a, Nilaini zan khan French manager enkawl Crystal Palace chuan Premier League inkhelah Manchester United 1-1 in an chelh.

Selhurst Park Stadium-ah Man United striker thar Wout Weghorst-a'n inkhel bul a ṭan a, Bruno Fernandes hmangin minute 44-naah mikhual team-in hma an hruai bawk. Amaherawhchu injury time-ah Michael Olise-a'n mawi zetin freekick aṭangin a khung a, United keeper David de Gea tan dan rual a ni lo.

Weghorst chu

Man United striker thar Weghorst hi feet ruk leh inches ruka sang a ni a, boruaka ṭha viau tura ngaih theih ni mah se Palace lakah hian beisei a pha lo. Dutch striker hian first half-ah ṭum khat chu a tauh fuh a, goal zawnah a kal lo.

Kum 30 mi Weghorst hi Anthony Martial inhliam vangin bul a ṭan a, amaherawhchu goal hmaah a hriam tawk lo. Chutihrualin leiah erawh a ball khawih a dik viau a, United mamawh chhanna ni tur erawh chuan tun aia hmasawn a ṭul ang. Minute 69-naah Scott McTominay-a'n a thlak a, Dutch striker hi a khel tluan lo.

Vieira naute

Crystal Palace an thawkrim a, match thum chak lo zawn tawh an ni nachungin Man United lakah point hmuh an phu. Odsonne Edouard goal khung tur chu United goalkeeper David de Gea-a'n ṭha zetin a dang.

Spanish keeper hian Marc Guehi tauh goal tur pawh a dansak. Man United-in first half-ah chance insiam ve bawk mah se second half-ah erawh Palace tlarhnung a phui ṭha hle. Injury time-ah Olise-a'n yard 25 aṭangin freekick ṭha bik a khung.

Chutihrualin Palace hi an vannei tel tiin a sawi theih. Minute 72-naah Chris Richards-a'n box chhungah McTominay a titlu chungin referee Robert Jones-a'n penalty a pe lo. Hun tawp hma hretin Casemiro-a'n Bruno Fernandes-a cross chu goal-ah a chantir thei lo bawk.

Casemiro 'Out'

Manchester United-in January 22, Pathianni zanah Arsenal hmachhawn turin Emirates Stadium an tlawh dawn a, Palace laka yellow card hmutu Casemiro a khel thei dawn lo. Brazilian midfielder hian Premier League-ah yellow card vawi nga a hmu tawh a ni.

Erik ten Hag chuan, "Casemiro tel loin kan hneh tawh a, tun ṭumah pawh hian a danglam dawn lo," tiin Gunners a hlauh loh thu a sawi. Man United hi match 20-ah vawi khat chiah an chak loh avangin Arsenal hlau tur an ni lo a, chutihrualin Gunners hi an hneh lo a nih chuan Premier League champion beiseina a tawp nghalah a ngaih theih thung ang.