Arsenal leh Trossard an inhnaih

Premier League hmahruaitu Arsenal chuan an tlarhma thuam chak ngei an tum a, squad tichak turin Brighton winger Leandro Trossard an dawr - Italian journalist Fabrizo Romano tarlan dan chuan inbiakna pawh a kaltluang viau.

Gunners leh Trossard te hi mimal thilah chuan an inrem tawh a, loan hmanga hawh loin a ngheta lak an tum. Tun season EPL match 16 a khelh aṭanga goal sarih khungtu hi an la thei a nih chuan an ṭangkaipui ngei ang.

North London club hian hun rei tak chhung chu Mykhailo Mudryk an hel uluk hle a, mahse Ukraine forward hian sum tam zawkna Chelsea a pan san daih - squad thuam chak ngei an duh avangin midang an melh a ngai.

Kum 28 mi Trossard hi pound maktaduai 20 man bawr vel tur nia sawi a ni. English football inelna sangah a tlangnel sa tawh a, a bik takin tun season a hman ṭhat em avangin Gabriel Jesus chhawr thei lo mek Arsenal tha tichak thei tur a nih ngei a rinawm.

Belgium international leh Arsenal inbiakna hi a kaltluang hle, beisei anga thil a kal zel a nih chuan nizan khan an inlei fel hman hial mai thei. A contract rei zawng tur hi nimin tlai kha chuan tarlan a la ni lo a, hun rei tak chhung atan tia ziah a ni.

Mikel Arteta naute hian league match 18 aṭangin point 47 an hmu tawh a, champion lai leh anmahni hnaih bertu Manchester City aiin point riatin an sang fal mek. Pathianni zan hian Emirates Stadium-ah Manchester United an mikhual ang.