Sabalenka a kaltluang

Aryna Sabalenka chuan a khelh ṭhat a chhawmnung zel. Australian Open khelh laiah nimin khan Sabalenka hian Shelby Rogers 6-3, 6-1 in a sawp a, harsa vak loin third round a inhlangkai.

Seeded pangana Sabalenka hian kum bul a ṭan fuh, Australian Open hma hian inbuatsaih nan Adelaide International-ah a champion, tun hnaiah a zawnin match ruk chhung hnehna a chang ta.

Inkhel tir lamah Saba-lenka hi 3-1 in a hniam zawk, mahse a zawna game nga la chhoin set hmasa a la, set hnuhnung zawkah chuan game khat chauh hloh chungin a chungnung ta hle.

Sabalenka chuan, "Shelby Rogers kha player ṭha a nih tih ka hria, chuvangin a tir aṭang khan ka fimkhur hle. Chuti chung chuan a tirah chuan ka che fuh lo zawk tih phat tur a awm lo," tiin a sawi. Elise Mertens leh Lauren Davis inkhela chak zawk a hmachhawn leh ang.