Gill-a'n double century a siam

India chuan Nilaini khan New Zealand chu Shubman Gill-a double century hmangin 12 runs-in an hneh. Men in Blue hian 349/9 runs siamin awlsam taka chak thei turin lang mah se Kiwis hian 337 runs an siam a, over tawp thlengin inkhel boruak a ṭang.

Rohit Sharma hote hian New Zealand nen hian ODI match thum an khel dawn a, match hnihna hi Raipur-ah January 21, Inrinni hian an khel ang. Match tawpna ber hi January 24, Thawhlehni hian Holkar Cricket Stadium, Indore-ah an khel leh dawn a ni.

Mi bikte

India tan ODI-a double century siam thei hi kut zungṭanga chhiar theih lek an awm. Sachin Tendulkar leh Virender Sehwag ten vawi khat ve ve an siam tawh a, Rohit Sharma-a'n ṭum thum a siam tawh thung.

Ishan Kishan chuan nikum December thla khan Bangladesh lakah double century a rawn siam a, mi bik huangah Shubman Gill a rawn inziaklut leh bawk.

Kum 23 mi Shubman Gill-a'n ball 149 lekah 208 runs a siam a, India chu dinhmun ṭha takah a dah. Mualneitu hian over 50-ah 349/8 runs an siam a, Rohit Sharma (34) leh Suryakumar Yadav (31) ten run 30 an vaw tling ve ve bawk.

Inkhel tinungtu Bracewell

India bowler-ten bul an ṭan ṭha a, over 28.4-ah wicket ruk la tawhin Kiwis hian 131 runs lek an la siam. New Zealand target a san bakah top order-te an chet chhiat avangin thawhchhuah a beiseiawm tawh lo.

Mahse, pasarihnaa lut Michael Bracewell-a'n India bowler-te ball vawm chu kil tinah vaw chhuakin ball 78 lekah 104 runs a siam. Mitchel Santner-a'n Bracewell a rawn thlawp ṭha bawk a, ball 45-ah 57 runs a siam ve bawk.

Over tawp berah New Zealand tan chak turin 20 runs siam a ngai a, Bracewell-a'n six runs a vuak nghal bawk avangin India an hlauthawng hle. Mahse, Shardul Thakur-a'n Bracewell hi a vawm hlum a, 49.2 overs-ah Kiwis an thi kim a, 337 runs siam hmanin 12 runs chauhin target an pha lo.

Indian bowler-te'n an hna an thawk tawk lo a, chutihrualin 46 runs chauh pea wicket li latu Mohammed Siraj a khel ṭha hle.