Italian Super Cup latu Inter Milan

Inter Milan chuan AC Milan hnehin Italian Super Cup an chawi. Inter tan hian Federico Dimarco, Edin Dzeko leh Lautaro Martinez ten goal khat ṭheuh an khung a, an hmelma lakah 3-0 in hnehna an chang.

Season hmasa khan Inter Milan hian Juventus hnehin Italian Super Cup an lo la tawh bawk a, a kum zawnin nomawi an chawi. Italian Super Cup bikah chuan Inter hian Milan an hneh vawi khatna a ni hial.

Serie A champion an nih avangin Milan hi an inlan a, an khingpui Inter hi Coppa Italia champion an ni thung. Kum 1977 leh 2011 khan team pahnih hian Super Cup hi an lo inchuh tawh bawk, heng inkhelah erawh Milan zawkin hnehna an chang.

Inter Milan coach Simone Inzaghi chuan, "Tun season atana kan thil tum hmasa ber chu Champions League last 16 luh kha a ni a, a dawtah chuan tunah Super Cup lak hi a ni leh bawk, a ti hlawhtlingtu ka naute ka fak hle.

"Milan hneh chunga nomawi chawi hi a nawm dan pawh a danglam. Inkhelh tir aṭang khan kawng engkimah kan chungnung zawk a, kan khel a nghet ṭhain hlauhthawn lai kan nei lo," tiin an khel ṭha hle tih a sawi.

Tun hmain Inzaghi hian Lazio pawh Super Cup a lo chawi pui tawh a, tun ṭum hi nomawi vawi lo a chawina niin champion hnem Fabio Capello leh Marcello Lippi te record ṭha tak chu a nihrual.

AC Milan coach Stefano Pioli chuan, "A bik takin first half-ah kan khel chhia, tih sual kan ngah em avangin insiamṭhat kha a harsa tawh a ni. Second half-ah hmasawn tumin kan bei a, amaherawhchu thawh chhuah nan a tawk zo ta lo.

"Hmasawn turin kan beih lehnghal a ngai dawn, tuna kan khelh dan kha chu kan nihna dik tak a ni lo. Kan dinhmun ngai anga kan awm leh thei nan a rang thei ang berin kan insiamṭha tur a ni ang," tiin a sawi.