Nadal a chawl rei dawn

Australian Open 2023 aṭanga a tlak hnuah Rafael Nadal chuan chanchin lawmawm lo a nei zui, a khel bawr hliam lamin chawlhkar riat chhung vel a chawlh a ngai dawn.

Nilaini khan Nadal hi Mackenzie McDonald nen an inhmachhawn a, set hnihna an khelh laiin a hliam. Match khel tluan tho mah se Nadal hian ni dang a phak lo, inkhelh zawhah a hliam hi endik niin a chawlh chen tur a chiang.

Kum 36 mi Nadal chuan, "Ka khel vei lam bawrah a hliam, tunah chuan ngaiawh leh tura ka beih phawt a ngai dawn. A tlangpuiah chuan hetiang vanga hliam hi chu kar ruk aṭanga kar riat chhung vel chawlh a ngai ṭhin," a ti.

World number 2 hian tournament ṭhenkhat chu a khel thei dawn lo tihna a ni a, ruahman leh beisei huna a dam thei a nih chuan March thlaa khelh tur Indian Wells-ah chuan a inlan hman a rinawm.

Indian Wells a khel thei lo a nih pawhin, a hnu lamah clay court season an hmang ṭan dawn chauh a, a inkhelh thiamna ber hmunah chuan a inlan hman ngei chu a rinawm - a vawi 15 nan French Open title lak a tum dawn.

Season hmasa khan Nadal hian Australian Open leh French Open nomawi a chawi, kuminah chuan Grand Slam title a kawl lai zinga pakhat zawk chu a hloh ta phawt a ni.