Copa del Rey: Atletico Madrid an chak
Spanish football-a inelna ngaihhlut hlawh Copa del Rey round of 16-ah Atletico Madrid an chak a, khualmualah Levante chu 2-0 in an hneh - quarterfinal an lut.
Atletico tan hian Alvaro Morata leh Marcos Llorente te chuan goal khat ve ve an khung a, Levante lamin a chhanletna tur an neih loh avangin Spanish Cup chu an mangṭha.
La Liga club langsar zingah Valencia chuan 4-0 ngawtin Sporting Gijon an sawp a, Edinson Cavani chuan a la tar lo tih pholangin goal hnih a khung a, Justin Kluivert leh Samuel Lino ten goal khat ve ve an khung bawk.
Athletic Bilbao chuan Oscar de Marcos goal hmangin Espanyol chu 1-0 in an hneh a, Real Betis erawh Osasuna nen 2-2 a an inhnehtawk hnuah, penalty hmangin 4-2 in an tlawm.
Hei le Atletico
Second division club Levante khelmuala an leng chungin Atletico-in goal khung an harsat a, first half an khel ṭha tawk lo - mahse, chawlhlawk hman a nih hnuah an insiamṭha a, goal hnih an rawn khung.
Minute 54-naah Marcos Llorente siamsak chu Morata chuan goal hmahruai ni turin a khung a, hun pek belh minute khatnaah Lllorente chuan chak nemnghehna goal a khung ve leh bawk.
La Liga match hnuhnung pahnih aṭanga point khat chauh hlawh chhuaktu Atletico tan chuan result ṭha bik a ni a, kum 2018 hnua a vawi khat nan Copa del Rey quarterfinal an lut.
Atletico boss Diego Simeone chuan, "A tirah kan talbuai a, goal-a shot pawh kan nei lo a, kan theihna sang ber a ni lo. Chawlhlawkah ball keng deuh turin kan infuih a, ṭha takin an khel thei tih kan chiang a ni," a ti a, second half-ah an insiamṭhat thu a sawi.
A hming Cavani
Kum 35 mi ni tawh mah se Cavani theihna a la sang reng a, Manchester United-in nipui laia contract thar an zawrh loh striker hian Valencia tan goal hnih a khung a, a team a chakpui.
Cavani hian tun season inelna hrang hrangah match 11 khel tawhin goal sarih a khung der tawh a, assist vawi khat a nei bawk - a la tar mawlh lo!
Valencia hian second division club Sporting Gijón lakah 4-0 in hnehna an chang a, Cavani bakah Netherlands legend Patrick Kluivert fapa Justin Kluivert leh Brazilian winger Samuel Lino ten goal khat ve ve an khung bawk.
La Liga match thum a zawna an chak zawh loh hnuah Bilbao pawhin Spanish Cup-ah rilru damna tur an hmu a, Oscar de Marcos goal hmangin Espanyol chu 1-0 in an hneh.
Betis an vanduai
Real Betis an che fuh thei lo - Spanish Super Cup semifinal-a Barcelona nen 2-2 a an inhnehtawk hnua, penalty-a 4-2 a tlawm Betis hi penalty ah bawk an tlawm leh ta a, Osasuna nen 2-2 a an inhnehtawk hnuah penalty hmang bawkin 4-2 in an tlawm.
Betis hian vawi hnih ngawt hma an hruai - William Carvalho goal hmahruai chu Osasuna hian minute 90+1-ah David Garcia hmangin an chhanglet a, extra time-ah Youssouf Sabaly hmangin hma hruai leh mah se Ruben Garcia hmangin Osasuna hian an chhanglet.
Hun tawp thlenga goal dang a luh loh avangin penalty hmangin chak zawk zawn a ni a, Osasuna tana pettuten an pet goal vek laiin Betis tan Guido Rodriguez leh Sergio Canales ten an pet goal lo a, 4-2 in Betis an tlawm.