Bengaluru tan beisei a bo lo

Beisei anga season bul ṭan lo Bengaluru an insiamṭha zel a, a zawna a vawi thum nan Indian Super League-ah an chak ve leh ta - Nilaini zan khan Jamshedpur FC chu 3-0 in an hneh a, semifinal an la beisei ve zel.

Bengaluru tan Rohit Kumar, Roy Krishna leh Sivasakthi Narayanan ten goal khat ṭheuh an khung a, mualneitu Jamshedpur lamin a chhanletna tur an nei lo.

Bangalore club hian hnehna an chan avangin top four china awm ATK Mohun Bagan chu point li chauhin an phak lo tawh a, chutihrual chuan match hnihin an khel tam zawk tih erawh hriat a ṭha.

Men of Steel tan Ricky Lallawmawma, Laldinliana Renthlei leh Laldinpuia Pachuau ten inkhel bul an ṭan vek a, Durtlang tlangval Ricky-a ball cross ṭha tak Harry Sawyer-a'n a tauh goal loh chu uiawm a tling.

Nizan khan Mumbai City leh NorthEast United inkhelin, result kan hre hman lo a, zanin dar 7:30-ah Jerry Lalrinzuala leh Lalchungnunga ten hmun pawimawh an channa, East Bengal chuan Hyderabad FC an mikhual bawk ang.