Emirates Stadium-ah Man United

Premier League hmahruaitu Arsenal hian tun season league kal laiah 'Chak Loh' vawi khat chiah an la nei, chumi ṭuma an hneh loh chu Manchester United an ni. Pathianni zan dar 10:00 hian Emirates Stadium-ah Erik ten Hag-a naute an lo mikhual dawn, inkhel a hmuhnawm khawp ang.

Old Trafford-a an inkhelh ṭum khan Man United hi 3-1 in an chak, an chak loh danah Gunners lamin sawisel zui tur an nei nual - point erawh an hmuh phah chuang lo, phuba an lak let theihna remchang ber chu tun ṭum hi a ni dawn.

Chak tum United

Manchester United hi an match hnuhnung berah Crystal Palace nen an inhnehtawk, hun tawp dawna goal an chhuah avangin point hnih an hloh a, match kua ngawt an chak kaltuang lai chu Arsenal captain hlui Patrick Vieira nauten an lo tihtawpsak.

Palace lakah Casemiro chuan yellow card a hmu a, season kal laia yellow card vawi nga a hmuhna a nih avangin hrem a tawk Brazilian midfielder hian Arsenal a hmachhawn thei dawn lo, an player pawimawh zinga mi a tel dawn lo tihna a ni.

Man United manager Ten Hag chuan, "Arsenal kan hneh ṭum khan Casemiro a tel lo, chuvangin kan squad neih hmangin a hmun ruak hnawh khah kan tum ang. Arsenal hneh thei kan ni tih hi a takin kan lantir tawh," tiin a inringtawk hle.

An intawn hmasak kha chuan Casemiro hi Man United tan rinrawl a la ni lo, tun hnaiah erawh midfield khai dingtu pawimawh a ni thung. Fred chungah mawhphurhna a sang dawn a, tlarhma hriam tak Gunners lakah an fimkhur a ngai dawn.

Hmahruaitu nge nge

Season ṭan dawn khan Arsenal hi Premier League champion tura rinkai an ni lem lo, tunah erawh rinkai ber Manchester City chungah an awm. Gunners hian Man United hneh chunga champion an chak zual ang, chuvangin tlawm nawn an duh dawn lo.

Gabriel Jesus bak chu an player neih ṭhat pangngai an dam kim. North London derby-ah inkhel thunun chungin Mikel Arteta naute hian hnehna an chang hlim a ni a, inrintawkna an nei sang - captain Martin Odegaard hoin goal an nawr leh ang.

Gabriel Martinelli leh Bukayo Saka te an rintlak a, a laia khel Eddie Nketiah a thawkrim ṭhin a, striker ṭha ni tur chuan inkhel pawimawha goal khung a mamawh; Man United lakah a khung a nih chuan Spurs laka a hlah ho kha fans lamin an ngaidamin a rinawm.

Mual sira khelhtir Ben White-a'n tun hnaia khel ṭha em em mai Marcus Rashford dan a tum dawn. English player pahnih inveng hi a hmuhnawm dawn a, inkhel result thui taka hril theitu an ni tel nghal bawk ang.