Pep-a'n a naute leh fan-te a duhkhawp lo

Manchester City chuan Ningani zan khan Tottenham Hotspur lakah 2-0 a an hnufual hnuin 4-2 in an lehthal a, Premier League champion laiin point thum hlu tak hlawh chhuak mah se Pep Guardiola-a'n a naute leh fan-te fuih nan a hmang thung.

Etihad Stadium-ah Spurs tan Dejan Kulusevski a che ṭha a, Swedish fowrward hian minute 44-naah goal hmahruai khungin injury time-a Emerson Royal goal khung theihna tur pawhin a inrawlh leh bawk.

First half-ah 2-0 a ni a, City an khel ṭha tawk lo - goal hmasa zawk pawh Ederson leh Rodri te tihsual vang a ni a, Spurs player-te pressure pekah an buai.

Second half-ah City an insiamṭha a, minute 51-naah Julian Alvarez hmanga siphurh sut ṭhenin minute hnih hnuah Erling Haaland-a'n a khung leh bawk. City tana hmuhnawm ber ang hiala chhal theih Riyad Mahrez-a'n minute 63-naah hmahruaina goal a khung a, Algerian winger hian minute 90-naah a khung belh leh bawk.

Inkhelh banah Pep Guardiola chuan, "Season liam ta nen chuan kan inthlau hle. Tuna kan lehthal ang hian kan khingpuite kan lehthal reng em? A teuh lo.

"Engtin nge ṭha takin kan khelh leh thei ang tih chu ka mawhphurhna a ni.

"Chutihrualin min ṭantute kha neih let leh ka duh. Ka team-te pawh ka hre chiang tawh lo - halftime-a ka thusawi phei chu ka sawi dawn lo. Mahse, club chhunga mi zawng zawng hian chak duhna kan lantir a ngai. Player, staff leh min ṭantute thlengin chak duha kan tuihal a ngai, fan-te pawhin minute khatna aṭangin min au phur nghal tur a ni," tiin insiamṭhat an mamawh thu a sawi chhuak.

An elpui Arsenal chungchang sawi chhunzawmin Pep chuan, "Arsenal inkhel ka hmu a, an khel ṭha a, chuvangin hmahruaitu an ni. Tawnhriat ṭha tak ka nei a, nomawi tam tak ka chawi tawh. Ni tin hian inhmuh loh ang hi ka hmu a, tuna kan chak tawk lohna hi player pakhat vang a ni lo a, kan vaiin a ni. Kan rawn tho chhuak leh ang," tiin a sawi.

Man City hian Pathianni zan dar 7:30 hian Wolves an mikhual lehnghal dawn a, Pep-a hote hi eng ang chiahin nge an insiamṭhat tih chu Julen Lopetegui leh a hote hmaah hmuhin a awm ang.