Cody Gakpo a inringtawk

Liverpool forward Cody Gakpo chuan a club thar tan goal la khung lo mah se, a khung thuai a inrin thu a sawi a, PSV Eindhoven aṭanga Reds zawmtu chuan, "Ka team tana danglamna thlen thei khawpa ka khelhchhuah theih ngei ka beisei," a ti.

Netherlands interna-tional hian January transfer-ah Liverpool hi pound maktaduai 35.4 - 44.3 inkar vela toin a zawm a, Reds tan inelna hrang hrangah match thum khel tawhin, goal khung a la nei lo.

Mahse, Gakpo chuan, "A lo thleng thuai ang. Team tharah chuan insiamrem turin hun kan mamawh ṭhin a, kan ṭhiante khelh dan thlengin hriat bel phawt a ngai ṭhin.

"Kan inhriatchian phawt a ngai a, game tinah kan inhrechiang telh telhin ka hria. Chelsea lakah phei chuan a danglam tawh ang," a ti a, a inringtawk hle.

Liverpool hian zanin dar 6:00-ah Chelsea nen league match an khel dawn a, Anfield-a inkhel tur an nih avangin beiseina sang tak an nei ang - club pahnih hi tun hnaiah an talbuai dun hle.

Reds hian match 18 khelh tawhah point 28 neiin, table-ah pakuana an ni mek a, 10-na ni mek Chelsea nen an point hmuh zat a inang. Blues hian match khatin an khel tam thung.

Liverpool boss Jurgen Klopp-a tan Chelsea laka an inkhel hi coach a nih hnua match 1000 a team a kaihhruaina tur a ni a, Mainz 05 leh Borussia Dortmund pawh lo enkawl tawhtu coach hian a tana game pawimawh bikah tlawm a duh lo ang.