Ronaldo leh Messi an intawng leh ta

Football khawvela player ropui sawi a nih apianga lam hmaih ni ngai lo tur Cristiano Ronaldo leh Lionel Messi-te chu Ningani zan khan an intawng leh ta a, an intawnna thawnthu erawh a danglam ta.

Ronaldo-a'n Riyadh All-Star XI tan a khel a, Messi-a'n Paris St-Germain tan a khel thung - friendly match a ni a, Messi telna PSG hian 5-4 in hnehna an chang.

Kum 37 mi Ronaldo-a'n khawvela footballer hlawh hnem ber ni tura Al-Nassr a zawm khan mi tam zawkin Messi nen an intawn leh an ring tawh lo - mahse, sum ngah Saudi Arabia lamin friendly match an buatsaih a, PSG an ko kal a, Messi nen an intawng.

Messi hian minute thumna lekah goal hmahruai a khung a, Ronaldo chuan minute 34-naah penalty hmangin a sut zui - penalty hi Real tana a khelhpui ṭhin, PSG keeper Keylor Navas-a'n ball hnek chhuah a tumna lama Ronaldo a tihpalh avanga a chawi a ni.

PSG tan Marquinhos chuan rawn khung ve leh mah se, first half hun pek belhah Ronaldo bawk a inlar a, a ball tauhin post per mah se, a per lehlam chu rang takin goal-ah bawk a chantir.

Minute 61-naah player ropui pahnih hi lakchhuah ve ve an ni a, football khawvelin kha inkhel kha an pahnih intawnna a hmuh hnuhnung ber a ni mai thei - sawi lawk theih a awm lo.

French club tan second half-ah Ronaldo ṭhianpa Sergio Ramos, Kylian Mbappé (penalty) leh Hugo Ekitike ten goal khat ṭheuh an khung a, Riyadh XI tana Jang Hyun-Soo leh Anderson Talisca goal khungin awmzia a nei zui lo a, 5-4 in PSG an chak.

Kum 2020 Champions League-a Juventus leh Barcelona an intawn ṭuma an inhmachhawn kha Ningani zan hmaa Ronaldo leh Messi intawn hnuhnung ber a ni a, player pahnih an intawn leh meuh chuan rin loh lam daihah an intawng ta - official-a inkhel a ni ta lo bawk.

Ligue 1-a point thuma sang fal mek PSG hian Thawhṭanni zan dar 1:15-ah French Cup round of 32 khel turin Pays de Cassel an lenchilh zui dawn a, Ronaldo khelhna Al-Nassr chuan Pathianni zan dar 11:00-ah league match khel turin Ettifaq an mikhual ang.

Manchester United tana a khelh laia a hremna avanga Al-Nassr tana la inlan lo Ronaldo hian Pathianni zanah a club thar tana a match hmasa ber a khel dawn a, a inkhel en duh tan Shahid – MBC app kaltlangin live-in a en theih ang - mahse, thla khatah Rs. 1,140 sen a ngai thung.

Al-Nassr hian league match 30 khelh turah match 13 khel tawhin pahnihna an ni mek a, hmahruaitu Al-Ittihad chu match khata khel tlem chungin, point khat chauhin an phak lo mek.