Aizawl FC hmachhawn tur Neroca

Aizawl FC-in vawiin tlai dar 4:30 hian Neroca hmachhawn turin Khuman Lampak Main Stadium an tlawh dawn a, Mizo club tan I League match inkhel pawimawh a ni. AFC hian Delhi-ah Sudeva Delhi an hneh zo chiah a, chutihrualin an khingpui tur Neroca hian Imphal derby-ah Trau an hneh ve bawk.

Mizo club tana chanchin lawmawm chu striker Henry Kisseka che ṭha hi a ni a, Ugandan forward hian match hnuhnung pahnih aṭangin goal thum a khung. Chutihrualin AFC tan Mizo player-te an che ṭha ṭhin a, midfielder ni chung siin Lalchhanhima Sailo-in goal a khung thei a, ṭhiante siamsak kawngah R. Ramdinthara a langsar viau bawk.

Neroca tan forward Jourdaine Fletcher chu team innghahna a ni a, Jamaican forward hian I League match 11 aṭangin goal li a khung bakah assist ṭum khat a nei tawh. Chutihrualin an khelh tawhna thlir chuan Mizo club hi a buk rit zawk an ni a, RG Stadium-a an hneh tawh Neroca hi an hneh nawn a nih chuan table chunglamah an awm thei ang.