Ranji Trophy-ah Mizoram chak

Mizoram cricket team chuan Ranji Trophy-ah Arunachal Pradesh an hneh. India rama domestic cricket inelna sang berah Mizoram hian vawi thum hnehna an chang tling ve ta chiah a, zawimuangin hma an sawn ve zel.

Ningani khan Narendra Modi Stadium, Ahmedabad-ah Mizoram leh Arnachal hi an inhmachhawn a, Mizoram hian innings khat leh run 27-in Arunachal Pradesh hi an hneh a ni.

Ṭhum vawra vannei zawk Arunachal Pradesh lamin vuak hmasak an thlang. Over 87.2 aṭanga run 199 siamin an out vek. Mizoram tan Remruatdika Ralte, Bobby Zothansanga, Avinash Yadav leh Taruwar Kohli ten wicket hnih ṭheuh an la.

Mizoram lamin vaw ve lehin an che ṭha hle. Zothanzuala’n run 27-in bul a ṭan a, Taruwar Kohli (144 runs) leh Joseph Lalthankhuma (73) te an ding nghet hle. Anni pahnih bakah Avinash Yadav (125) leh Sumit Lama (74) ten hna an thawk ṭha bawk a, run 485 zet an siam.

Innings hnihnaah Arunachal Pradesh lamin thawh chhuah ngei an tum a, amaherawhchu run 259 siamin an out leh vek. Mizoram lamin innings khatnaa run an siam pawh run 27-in an um phak lo.

Mizoram tan Avinash Yadav chuan wicket ruk a lak bakah, vice captain Bobby Zothansanga chuan wicket thum a la bawk.