Copa del Rey - Barca leh Real-in quarterfinal an lut

Spanish football-a inelna ngaihhlut hlawh Copa del Rey quarterfinal khel tur a hriat kim ta - Ningani zan khan Barcelona leh Real Madrid ten an khingpui ve ve an hneh a, a thiam pariat zingah an tel ve leh ta.

Barcelona hian khualmualah third division club AD Ceuta chu 5-0 in an sawp a, Robert Lewandowski chuan goal hnih khungin, Raphinha, Ansu Fati leh Franck Kessié ten goal khat ṭheuh an khung bawk.

Hetihlai hian Real Madrid chuan goal hnih chhuah hmasa zet mah se Villarreal lakah comeback ropui an lantir a, 3-2 a hnehna changin quarterfinal an inpetkai.

Villarreal-in thlatira La Liga-a an hneh tawh hnu Real Madrid an zuam a, first half-ah Etienne Capoue leh Samuel Chukwueze goal hmangin hma an hruai a, 2-0 in chawlhlawk an hmang.

Mahse, second half-ah Real Madrid tan Vinicius Jr., Eder Militao leh Dani Ceballos ten goal khat ṭheuh an khung a, Villarreal-in goal an khung ve tawh loh avangin Real an chak.

Club pahnih hian Pathianni zanah league match an khel zui dawn a, Barcelona hian zan dar 11:00-ah Getafe mikhualin, Real Madrid-in zan dar 1:30-ah Athletic Bilbao an lenchilh thung ang.