Golden State hnehtu Celtics

NBA champion lai Golden State Warriors leh Boston Celtics ten basketball hmuhnawm an chhawp chhuak a, nimin zing NBA regular season inkhel hmuhnawm takah Celtics hi 121-118 in an chak.

Team pahnih hi season hmasa khan NBA Finals-ah an inhmachhawn a, Golden State an chak. Tun season kal laiah erawh Boston hi team ṭha zawk an ni rih a, table chunglam luahtu niin an khel ṭha thei hle.

Boston Celtics tan Jayson Tatum chuan point 34 a neih bakah rebound vawi 19 a la bawk a, ani bakah hian Al Horford (20 points), Marcus Smart (18), Jaylen Brown (16), Robert Williams III (14) leh Malcolm Brogdon (14) te an che ṭha vek bawk.

Champion lai Warriors tan player pawimawh Stephen Curry, Klay Thompson, Draymon Green, Andrew Wiggins leh Jordan Poole te an inlan kim vek a, khel ṭha pangngai viau mah se a tawpah Celtics an chungnung zawk.

Eastern Conference-ah Boston Celtics hian hma an hruai zel, match 34 chak tawhin ṭum 12 chauh chak loh an nei. Warriors hi Western Conference lamah pakuana an ni mek, vawi 22 chak tawhin vawi 23 an tlawm tawh thung.