Last 16-ah Pegula a lut

World number 3 Jessica Pegula chuan harsatna lian tham tawk loin Australian Open last 16 a invawkai. Nimina third round inkhelah Marta Kostyuk chu 6-0, 6-2 in a sawp a ni.

American star Pegula hi champion tura rinkai zinga mi a ni a, a khingpui hneh tur hian darkar khat leh minute nga bak hun a mamawh lo. Last 16 lut tur hian game 11 chiah a la hloh a, nuamsa takin a la chak zel.

Quarterfinal lut tur erawhin a hna a hautak ve deuh tawh dawn, a match lehpekah chuan 2021 French Open champion Barbora Krejcikova nen an inhmachhawn dawn, inkhel a hmuhnawm ang.

Czech Republic nula Krejcikova hian Anhelina Kalinina chu 6-2, 6-3 in a lo hneh ve thung. Tun inelna neih laiah Krejcikova hian match thum a khel tawh a, set hloh miah loin hnehna a la chang vek.

Inkhel dangah Wimbledon champion Elena Rybakina chuan nikum finalist Danielle Collins chu 6-2, 5-7 in a hneh ve bawk. Rybakina hian a match lehpekah chuan Iga Swiatek leh Cristina Bucsa te inkhela chak zawk a hmachhawn leh ang.