Cancer ngamtu Haller inlan dawn

Borussia Dortmund-in January 22, Pathianni zan dar 8:00 hian Signal Iduna Park-ah Augsburg an mikhual dawn. Nipui bazara Ajax aṭanga Dortmund zawmtu Sebastian Haller chuan cancer a ngam hnuin Augsburg a hmachhawn theih a rinawm a, hei hi football khawvelin an ngaihven chu a ni.

Dortmund hian July 6, 2022 khan Haller hi euro maktaduai 31-in Ajax aṭangin an lalut a, Ivory Coast striker man hi euro maktaduai 34.5-a pung chho thei a ni hial. Nikum July 18 khan Dortmund chuan Switzerland-ah training an nei a, hetah hian Haller hian damloh vangin training hi a chhunzawm thei ta lo - tilmu cancer a ni tih hriatchhuah a ni zui bawk.

Haller hian ṭum hnih zai a tawk a, chemotherapy cycle vawi li a la bawk. Hlawhtling takin Haller hi enkawl a ni a, kumin aṭangin training a zawm. January 10 khan Dortmund leh Fortuna Düsseldorf te friendly match an khelh ṭumin Haller hi bench aṭangin a lut a, ni thum hnuah Basel nen friendly match-ah bench aṭang bawka lutin minute riat chhung lekin hattrick a siam a, German club-in 5-0 in hnehna an chang.

Tunah chuan Haller hi inkhel turin a inpeih tawh a, Pathianni zana Augsburg an hmachhawn turah pawh bul ṭan thei dinhmunah a ding tawh a ni.