Nicola hoa inkhel leh tur Salernitana

Tun kartir khan Serie A team Salernitana chuan an coach Davide Nicola an ban a, an inṭhen aṭanga ni hnih lek a liam hnuah an coach ngai bawk hi an ruai nawn tih an puang - zanin dar 10:30 hian hmahruaitu Napoli an mikhual ang.

Kar hmasa khan Salernitana hian Atalanta chu 8-2 ngawtin an ngam lo, match 18 aṭanga point 18 chauh an la hmuh avangin Serie A table mawng lamah an awm mek, coach pawhin a hna a chan phah a, mahse hna a hmu kir leh a ni.

Club president Danilo Iervolino chuan, "Hloh thei dinhmuna kan din chiah khan kan hmangaih a ni tih kan hre thar. Club, player leh a chhunga awm zawng zawng tan coach thar ai chuan Davide Nicola hoa hnathawh leh hi a ṭha zawk," tiin an coach an la ring ngam.

Nikum February thla khan Nicola hian Salernitana hi a enkawl ṭan, club thuneitu chunga a lawm thu sawi zuiin Nicola chuan, "Ka chunga rinna leh beiseina nghat tute duh ang tihhlawhtlinsak ka duh," tiin a sawi.

Salernitana hian kum 20 hnua a vawi khat nan season hmasa khan Serie A an khel ve leh a, an hun tam zawk chu table mawngphaha awm nan an hmang. Mahse, Nicola an neih chinah point hmuh theih 18 zinga 15 hmuin an inhamtang.

Tun season-ah Italian football inelna sang ber an khel zui a, nikum lama chhanhim thawhtu hian a chhanhim leh theih ngei an beisei. Tla thei dinhmun china awm Verona nen an inthlauhna point kua a ni mek a, an dinhmun hi chhe tak a ni hran lo.