Liverpool leh Chelsea an in draw An lawm ve ve!

Inrinni zan khan Liverpool khelmualah Chelsea an lenglut a, tun season-a talbuai tak team pahnih hi 0-0 in an inhnehtawk - champion tum ṭhin team pahnih hi point khatah an lungawi a, hei hian an dinhmun a hrilhfiah.

Anfield-a inkhel an nih avangin Liverpool fan-ten beiseina an nei sang a, kar laihawlah game hmuhnawm tak pholangin Wolver­hampton Wanderers chu 1-0 in an hneh bawk - hei pawh beiseina siamtu a ni.

Mahse, Chelsea an mikhual leh meuh chuan hnehna chang tur khawpin Liverpool an ṭha tawk lo a, manager Jurgen Klopp meuh pawhin, "A tawpah chuan 0-0 ah hian ka lungawi tawk. Hei hi kan bul ṭanna a ni a, hma kan sawn zel ang," tiin draw-ah a lungawi thu a sawi.

Chelsea boss Graham Potter pawhin, "Goal kan chhuah lo a, point kan hmu bawk - kan kal zel ang," tiin a sawi a, coach pahnihin point khat an hmuh avangin lungawi an zir.

A hmuhnawm lo!

Anfield-ah beisei angin inkhel a hmuhnawm tawk lo a, Chelsea-in Kai Havertz hmangin goal hmahruai an khungah inngai mah se, a goal khung hi video assistant referee (VAR) hmanga ennawn a nih hnuah offside vangin pawmsak a ni lo thung.

Chelsea defender thar Benoit Badiashile chuan chance duhawm nei mah se Liverpool keeper Alisson chuan ṭha zetin a dansak a, player thar Mykhailo Mudryk pawh a hmuhnawm takzet.

Pound maktaduai 89 man Mudryk hian Chelsea tana a match hmasa berah Liverpool tlarhnung nasa takin a chhaih buai nghal a, goal erawh a keng tel lo thung.

Hun tawp thlengin team pahnihin goal an khung lo a, an inhnehtawk a, an lungawi - hei hian tun hnaia club dinhmun hniam takzia a hrilhfiah a, Reds hi table-ah pariatna niin, Chelsea chu 10-naah an awm.

Khawiah nge Reds?

Jurgen Klopp-a'n professional coach a nih hnua a match 1000-naah Chelsea a mikhual a, mahse, hnehna an chang zo lo. Klopp chuan, "Arsene Wenger pawh a match 1000-naah 6-0 in a tlawm tih ka hria a, khatiang a thleng lo kha ka lawm a ni," a ti.

German coach thu leh hla hi, "Ka ṭhiante pawh an fail ve tho," tia naupang thukhawchang ang mai a ni ta - an tho leh thei ang em? tih hi zawhna awm mek chu a ni a, season tharah Champions League an khel lo a nih chuan player ṭha an hip lo sawt ang.

Hliam vanga chawl mek Luis Diaz, Diogo Jota leh Roberto Firmino tel loin Liverpool tlarhma a hriam tawk lo a, Mohamed Salah meuh pawh a "Salah' hleithei lo a ni ber.

January-a pound maktaduai 45-a an lakluh Cody Gakpo-a'n Liverpool tan a theihna a la pholang tak tak thei lo a, tunah chuan Netherlands international hi player naran ang mai a la ni rih.

Hei hi maw Chelsea!

Graham Potter-a enkawlna hnuaiah Chelsea an che hleithei lo zel a, chutihrual chuan Liverpool khelmuala khel an nih miau avangin point khat hmu ve veah Liverpool aiin an lawm zawk mai thei.

Tun hnaia nghing fo, Virgil van Dijk awm loh hnua tlarhnung pherh lehzual Liverpool laka goal an khung thei lo kha Chelsea tlarhma tan inenfiahna tur a ni a, point-ah lawm mah se tlarhma hriam hret se, point thum hawn thei an ni.

London club tana lawmna tur erawh player thar Mudryk a khel ṭha em em mai kha a ni a, "A mit châk zawng apiang a hlah lo," tih ang maia transfer bazar-a insumkar lo tak Chelsea tan player ṭha sate chhawr thiam dan ngaihtuah zel a ṭul ang.

European club lian pahnih hi season thara Champions League khel lo thei dinhmunah an ding mek a, an insiamṭha vat a nih loh chuan player ṭhaten Anfield leh Stamford Bridge lam an hnuchhawn ngeiin a rinawm.