Number 1 Swiatek a tla

Australian Open seeded pakhatna Iga Swiatek chu Elena Rybakina hneh loin last 16-ah a zin kawng a tawp. Polish nula hian Wimbledon champion hi nimin khan 6-4, 6-4 in a hneh lo a ni.

Rod Laver Arena-a inkhelah Swiatek hian ni danga a service a phak lo, a khingpui service vawi hnih chhuhsak mah se vawi li a hloh thung a, darkar khat leh minute 29 an inkhelh chhungin Rybakina chu player ṭha zawk a ni.

Kum 23 mi Rybakina chuan, "A nihna takah chuan tennis court chhunga ka luh hi chuan ka la hlauthawng ve deuh ziah. Tun match bikah chuan hun pawimawh laiah tak ka che fuh hlauh zel.

"Coach khan Swiatek hneh turin theihna ka nei tih min hrilh a, tih sual nei tlem turin min fuih bawk. A sawi ang thlap chuan khel chiah lo mah ila, a duh ang chuan ka khel thei thawkhatah ka ngai," a ti.

Russia rama piang, mahse infiam­na huanga Kazakhstan tana inlan Rybakina hian a match lehpek­ah chuan Jelena Ostapenko a hma­chhawn ang. Inkhel dangah Ostapen­ko hian Coco Gauff a lo hneh ve thung.

Nimin inkhel dangah Ostapenko hian Gauff chu 7-5, 6-3 in a lo hneh ve thung. Gauff hi kum 18 mi chauh la ni mah se theihna a nei sang a, champion tura rinkai zinga mi pawh a ni, mahse Latvian player tawnhriat nei ṭha lakah a ding chang zo lo.