Djokovic chak laiin Murray leh Medvedev an tla

Australian Open 2023-ah player langsar an tla hnem ta viau. Andy Murray leh Daniil Medvedev te zinkawng pawh a tawp a, champion tura rinkai Novak Djokovic erawh hliamin tibuai deuh mah se a la chak zel.

Ropui takin Murray-a'n match hmasa pahnih a khel a, set nga ve ve an khelh hnuah a chak. Mahse, Inrinni khan Roberto Bautista Agut nen third round match hautak an khel zui leh a, 6-1, 6-7 (7-9), 6-3, 6-4 in a chak lo.

Second round an khelh rei bakah third round nen a inkar a rei lo a, match hmasa an khelh zawh aṭanga darkar 39 hnuah Murray hian match a nei zui leh a, a hliam damin khel thei viau mah se a taksain a tlin ta bik lo a ni.

Grand Slam vawi thum champion tawh Murray chuan, "Kumin Australian Open chu lawmna tur tam tak ka nei, result hi ka duhthlan theih ni lo mah se, court chhungah theihtawp chhuaha ka khel ve leh thei ta ringawt pawh hi lawmna tur a ni," a ti.

Medvedev a tla

Third round inkhel dangah Daniil Medvedev a chak lo. Russian tlangval hian tun hmain Australian Open hi final vawi hnih a khel tawh, kuminah erawh Tallon Griekspoor lakah 6-2, 7-6 (7-5), 6-3 a chak loin fourth round a lut phak lo.

Russian tlangval Medvedev chuan, "Ka hmuh dan chuan Tallon Griekspoor khan tennis class sang tak a khel a, tun match bikah chuan kei aiin a ṭha zawk. Tun ang inkhelah khan vawi tam tak ka lo chak tawh, mahse kumin chu ka hun a ni lo," a ti.

US Open champion hlui Medvedev hnehtu Korda tan chanchin lawmawm bik a ni. Australian Open last 16 a luh vawi khatna a ni a, a pa Petr hnung zui a tum ang. Petr hian 1998 khan Australian Open nomawi hi a lo chawi tawh.

Novak a tlang

Novak Djokovic erawh a malpui hliam deuh mah se, player ṭha bik a nihzia lantirin Grigor Dimitrov chu 7-6 (9-7), 6-3, 6-4 in a hneh. Vawiin tlai hian tualchhung tlangval, seeded 22-na ni bawk Alex de Minaur nen an inhmachhawn leh ang.

Serbian star Djokovic chuan, "Set thum khelh nan hian darkar thum chuang kan hmang, game tin mai pawh ni loin point khat lek hmu tur pawh khan a hautak em em a ni. Ka taksa dinhmun hi duhthusam lo lai a awm, a ṭha lo lam a nih chhunzawm loh ka beisei," a ti.

Djokovic hian Grand Slam nomawi 21 a nei tawh, vawi kua a champion tawhna Australian Open title hi a la leh thei a nih chuan major title lak hnem lamah Rafael Nadal (22 titles) a nih rual thei chiah ang.