Mizoram cricketer lar Michael-a a thi

Mizoram cricket team captain pawh ni tawh Michael Lalremkima chu January 20, Zirtawpni khan a thi a, Inrinni khan Kulikawn thlanmualah vui liam a ni.

Kulikawn YMA Hall-ah Michael-a vuina hun hman a ni a, Mizoram cricketer chuan zahna lantir nan 'guard of honour' an pe. Kulikawn Crikcet Club player-ten kuang an zawn chhuah laiin Mizoram cricketer hoin bat keng kangin a kalna tur an lo siamsak.

Kum 36 mi Michael-a hi a tleirawl chhuah aṭanga cricket tui a ni a, cricket hi a tuipui em avangin an huanah pawh practice-na turte a siam hial a, rualpui zinga thiam bik a ni.

Cricket club hrang hrang College Veng, Dawrpui, Ramhlun Venglai, UCC leh Chanmarians-ah te a lo khel tawh. Kum 2001 khan a ṭhiante nen Knights Cricket Club an din a, hei hi tuna Kulikawn Cricket Club hi niin a thih ni thlengin he club hi a enkawl.

Kulikawn Cricket Club hi a captain-na hnuaiah Mapuia Cricket League (MCL)-ah vawi thum a champion pui a, kum 2008 aṭangin Mizoram tan feh chhuak tawh. Kum 10 hnua Mizoramin first class cricket an khel ṭan a, Ranji Trophy-ah Mizoram captain hmasa ber a ni. Mizoram Cricket inelna lian Mahuma Memorial-ah kum 2016 khan Kulikawn champion puiin hemi ṭum hian mimal chawimawina best bowler, best player leh player of the tournament a hui vek.

Cricket Association of Mizoram chuan, "Mizoram chuan player ropui tak kan chan hi pawi kan tiin kan ui tak zet a ni," tiin thuchhuah an siam a, January 21-a 1st, 2nd leh 3rd Division Tournament match khelh tur pawh ṭhulh a ni.