Juventus point 15 an paihsak!

Italy football federation (FIGC) chuan Juventus chu Serie A lama point 15 an hmuh tawhsa an paihsak. Point an paihsak chhan hi hlep tam zawk an neih theih nana an sum dinhmun a dik loa an ziah vang a ni a, player an lak chungchanga pawisa ziah dik loh nghawng a ni.

Juventus hi Serie A-ah pathumna an ni mek a, mahse point an paihsak avang hian 10-naah an tla hniam. Champions League khel phak china awm Lazio an phak lohna chu point 12 an ni ta - season thara UCL khelh phak a harsa dawn.

Old Lady thuneitu lam, an president hlui Andrea Agnelli leh vice-president Pavel Nedved te chu nikum khan club chhung inrelbawlna fel lo vang hian an lo bang tawh. An thil tih dik loh erawh chhui zel niin, tun hnai khan hremna hi an ti chhuak.

Turin club dan hremi a hming tarlan loh chuan, an chuang thil thleng chu rorelna dik tawk lo a ni tih a sawi a, club-in an dikna chanvo leh fans lamin club thuneitute chunga rinna an nghah let leh theih nan theihtawp an chhuah tur thu a sawi.

Agnelli-a president a nih lai kum 13 chhung khan Juventus hian a zawnin Serie A nomawi vawi kua an la, mahse season hmasa khan palina an ni a, pound maktaduai 220 zet an hloh (loss), hei hi Italy rama club pakhatin season khata pawisa an hloh hnem record a ni hial.

Tun dinhmunah UEFA chuan Juve hi a chhui ve mek bawk, an chhui chhan hi player lei leh hralh chungchangah 'financial fair play' an bawhchhia em tih a ni a, thutlukna erawh siam a la ni lo thung.

Kum 2006 khan Juve hian hremna na tak an lo tawk tawh, hemi ṭum hian match fixing vanga hrem an ni a, Serie A nomawi an chawi tawh pahnih chhuhsak an nih bakah Serie B lamah an paihthla tawh bawk a ni.

Hun harsa an tawk mek a, hetih lai hian Juventus manager Massimiliano Allegri chuan, "Player leh coaching staff chuan pawm lam thil ngaihtuh loin khelmual chhung chauh kan ngaihtuah a ngai, a ṭha thei ang bera khel tura kan beih a ngai," tiin a naute a fuih.