Tlawm mah se Lampard a hlauthawng lo!

Everton boss Frank Lampard chuan ban a hlauh loh thu a sawi leh ta - hetiang thu an sawi hi chuan an result a chhia tihna a ni a, ban an ni dawn hnai, tihna a ni tlangpui bawk!

Inrinni zan khan West Ham chuan 2-0 in Everton hi an hneh a, Jarrod Bowen chuan goal hnih a khung - team pahnih hi tun hnaiah an talbuai a, a tlawm zawk Coach chu ban tawk mai tura ngaih an nih avangin 'El Sackico' tiin hminglem an pe hial.

A tawpah chuan Hammers boss David Moyes aia tawnhriat nei tlem zawk Lampard-a team an tlawm a, team 20 inelna league-ah Everton chu 19-na an ni a, a mawngphah luahtu Southampton nen an point a inzat chiah.

Season hmasaa European football thlenga lam ritu West Ham chu table-ah 15-na an ni a, Everton aia an sanna hi point thum chauh a nih avangin inchhuang thei bik an la awm chuang lo.

I lamah...

Everton fan-ten club thuneitute chunga lungawi lohna thu nasa takin an tlangaupui a, inkhelh hmaa fan pakhatin Lampard a biakna video darhah chuan, "I lamah kan ṭang tlat ania, kan duh loh chu club thuneitute a ni," tiin a hrilh.

Mahse, Lampard-a'n amah thlawptute an duh ang result a pe thei lo a, a hmuna inkhel entu, Everton neitu Farhad Moshiri chuan English coach a ban dawn leh dawn loh chungchangah, "Engmah ka sawi thei lo - ka thutlukna a ni tlat lo," a ti.

Hetihlai hian Lampard chuan, "Hlauthawng turin chutiang thleng thlengin ka ngaihtuah lo. He hna ka chelh thei hi ka inchhuang a, ban ka hlau miah lo. Kei chuan ka hna ka thawk mai a, zing ka thawh veleh hei aia kan ṭhat zawk dan tur ka ngaihtuah ṭhin," a ti.

Everton tlawm lai hi club chairman Bill Kenwright, chief executive Denise Barrett-Baxendale, football director Kevin Thelwell leh director Graeme Sharp te chuan a hmunah an en a, kar hmasaa Saints nena an inkhel kha fans kut an tawrh palh hlauhthawnna avangin a hmunah an en ngam lo.

Engtin zel?

Lampard chuan, "Season hmasa pawh khan a harsa tawh. Mahse, kan bei a, kan inhamtang a ni. Richarlison kan hralh a, a tel loa awm kan zir. Club dangin hmalam an pan laiin an ruala pen ve tho kan tum a ngai si a ni," a ti a, a player chhuanvawr thlakna tur a nei lo chu chhuanlamah a hmang

Hetihlai hian Newcastle United chuan 0-0 in Crystal Palace an inhnehtawkpui a, top flight league-ah an club chanchina a vawi khat nan match 15 zet chu a zawnin an tlawm ta lo - Palace keeper Vicente Guaita chuan vawi thum ngawt Joelinton goal khung tur a dansak a, Callum Wilson, Sven Botman leh Alexander Isak ten chance duhawm an hlah bawk.

Leicester City leh Brighton & Hove Albion chu 2-2 in an inhnehtawk - Brighton tana Kaoru Mitoma goal hmahruai chu Foxes-in Marc Albrighton leh Harvey Barnes hmangin an chhanglet a, mahse, Evan Ferguson chuan khung ve lehin, Brighton tan point a hlawh chhuak.

Aston Villa chuan Ollie Watkins goal hmangin Saints chu 1-0 in an hneh a, Bournemouth-in Jaidon Anthony goal hmangin chak inbeisei mah se Nottingham Forest striker Sam Surridge chuan minute 83-naah si phurh a sut a, 1-1 in an ṭin.