Leipzig-in Bayern Munich an chelh

Zirtawpni zan aṭang khan Bundesliga chu khelh ṭan a ni leh ta a, Red Bull Arena Leipzig-ah Bayern Munich leh RB Leipzig te 1-1 in an inhnehtawk. Bavarians hian Eric Maxim Choupo-Moting hmangin khung hmasa mah se Marcel Halstenberg hmangin mualneituin an sut.

Bayern hi champion lai leh champion rinkai an ni a, chutihrualin Julian Nagelsmann-a hote hi chetsual an chin avangin Bundesliga-ah lal thar piang thei a ni tho. Inrinni zan khan Bavarians hnuaia awm Eintracht Frankfurt leh Union Berlin ten hnehna an chang a, Bayern falna hi point nga chauh a ni.

World Cup nghawng

FIFA World Cup-ah Germany an che ṭha lo a, first round-ah an tla. Hansi Flick-a kaihhruai Germany team innghahna chu Bayern player an ni a, Qatar-a beisei an phak loh ang bawkin Bundelsiga-ah pawh an khel a nung nghal lo.

Chutihrualin Bayern captain Manuel Neuer chu thlasik chawlh laiin a inhliam a; World Cup laiin Lucas Hernandez leh Noussair Mazraoui te a inhliam a, Sadio Mane pawh inkhel turin a la inpeih lo. Germany lamah thlasik chawlh awm mah se Bayern an la inpeih lo.

Mahse, Leipzig pawh a dam kim bik lo. Goalkeeper Péter Gulácsi a la inlan thei bik lo a, David Raum leh Timo Werner te an la damchian loh avangin bench aṭangin an lut.

Keeper thar

Bayern-in Gladbach aṭanga an lakluh Yann Sommer an chhawr nghal a, Switzerland international keeper hi a rintlak hle. Match khat chauh lek a la khel chungin second keeper Sven Ulreich ai chuan Sommer hi a rintlak zawk tih a chiang.

Amaherawhchu, Sommer hian a clean sheet thei lo a, an goal chhuah danah erawh tih theih a nei lo thung. Bayern keeper Sommer hi referee thutluknaah a lungawi lo a, a chhan chu goal luh hma hian Leipzig player-ten Joshua Kimmich laka foul an neia ngaih vang a ni. Chutihrualin coach Nagelsmann erawhin referee thutlukna a hriatthiam thu a sawi thung.

Muller vs Musiala

Bayern-in theihna nei sang Jamal Musiala an kawl a, tawnhriat nei ṭha Thomas Muller nen an khelhna a inan avangin Muller hi bench-ah a awm phah. Muller thlakna tur 'talent' awm mah se Muller chhawr duh lotu coach-ten an hna an chan deuh zel.

Carlo Ancelotti leh Niko Kovac ten Thiago Alcantara, Mario Gotze, James Rodriguez leh Philippe Coutinho te vangin Muller hi bench-ah an lo dah tawh a, manager pahnihten Allianz Arena an chhuahsan laiin Muller erawh a cham reng thung.

Pep Guardiola-a'n Thiago leh Muller a khelh dun tir thei a, Jupp Heynckes-a'n James leh Muller khelh kawptirin Flick erawhin Coutinho bench-a dah a thlang. Nagelsmann hian eng ang thutlukna nge a hman zel dawn tih chu hunin a hril ang a, chutihrualin Muller pawh kum 33 mi a ni tawh tih a hriat a ṭha ang.