Atletico chak nuamsa

Champions League khelh tum Atlético Madrid-in kartawp inkhelah hnehna an chang a, Real Valladolid lakah 3-0 in an chak - Atletico tan Alvaro Morata, Antoine Griezmann leh Mario Hermoso ten goal khat ṭheuh an khung a, top four-ah an awm chhunzawm zel.

Atletico tan hian Barcelona aṭanga an lak thar Memphis Depay chuan a match hmasa ber a khel a, bench aṭanga luhtir a ni - Netherlands international hian pound maktaduai 2.6-in Atletico hi a zawm a, kum hnih leh a chanve atan contract a ziak.

Barcelona chuan club pahnih inremnaah hian, an duh chuan Atletico tana khel mek, Belgian winger Yannick Carrasco chu nakinah an la lakluh theih tur thu an sawi.

Tun season La Liga-a a vawi li nan Sevilla an chak ve bawk a, Ivan Rakitic-a penalty hmangin Cadiz chu 1-0 in an hneh. Real Sociedad chuan 2-0 in Rayo Vallecano an hneh a, Alexander Sorloth leh Ander Barrenetxea ten goal khat ve ve an khung - table-ah pathumna an ni.