Napoli an sang tual tual

Serie A hmahruaitu Napoli chuan Inrinni zan khan Salernitana 2-0 in an hneh. Italian football inelna sang berah Naples club hian match 19 aṭangin point 50 an hmu a, pahnihna AC Milan aiin point 12 ngawtin an sang fal ta.

Chawlhlawk hma chiahin Giovanni di Lorenzo-a'n goal hmahruai a khung a, second half tirah Victor Osimhen chuan a khung belh. Coach Davide Nicola an ban hnu lawka lalet leh tu Salernitana lamin a chhanletna an nei lo.

Kum 24 mi Osimhen-a'n tun season Serie A match 15 a khelh aṭangin goal 13 a khung a, goal khung hnem lamah amah hnaih bertu Inter Milan striker Lautaro Martinez aiin goal thumin a khung hnem.

Napoli hian Diego Maradona hoa Serie A nomawi an chawi bak chu an la chawi leh lo, an captain ropui hoa an hlawhtlinna aṭangin kum 33 a liam tawh a, an player ṭha bik Maradona pawh a thi tawh.

Maradona lim hi stadium-ah siam a ni a, an stadium pawh Maradona hming chawia dah a ni. Argentina tan pawha World Cup nomawi chawi tawhtu awm loh hnuah an champion lehna hmasa ber tur a beisei mek a ni.

Luciano Spalletti naute hian season an hmang ṭha viau, league bikah chuan match 19 an khelh tawhah chak loh vawi khat chiah an la nei. Tun thla tir lam khan Inter Milan 1-0 in an ngam lo, a bakah chuan an la tlawm lo hial.