A thiam zawk Arsenal an chak Man United tan hmabak la tam

Premier League hmahruaitu Arsenal chuan, anmahni rawn chhaih buai phak tuma ṭan la mek Manchester United chu 3-2 in an lo hneh a, table chung berah thlasik vanglai an hmang zel a, kumin thlasik bik chu vawt an titluan dawn niin a lang ta.

Champion lai Manchester City chuan Pathianni zan tirah Wolves 3-0 in an sawp a, an chunga awn Arsenal nen an inkar an tizim. Mikel Arteta naute tan chetsual a pawi thei, mahse Emirates Stadium-ah an thiam leh huaisenna hmangin point thum an hlawh chhuak.

Arsenal tan striker Eddie Nketiah-a'n hun tawp dawnah chakna goal a khung a, a bul ṭantu a nih bakah Bukayo Saka chuan goal mawi a khung bawk. Man United goal hnih hi Marcus Rashford leh Lisandro Martinez te khung a ni thung.

Laipui a puak

Tun hnaia khel ṭha thei tak Rashford-a'n inkhel bul ṭan ṭha zawk Arsenal a ngawihtir. Thomas Partey-a ball pet chhuah fuh tawk lo chu Rashford hian a chhawr, English forward hian chiang zetin Partey a bum zui a, yard 25-a hla aṭangin goal ropui a khung.

Goal an chhuah khan Arsenal an indawm kun lo, nasa taka infuih phurin an bei let nghal - hetiang rilru hi hun rei tak chhung an neih theih tawh loh kha a ni. Granit Xhaka-a cross chu vengtu bik nei lo Nketiah chuan hnai zetah a tauh lut.

Mual sira che hlauhawm thei tak Bukayo Saka-a'n second half tirah hla angreng tak aṭangin 2-1 a hmahruaina a khung, a goal khung tawh zinga mawi leh ropui a nih thu a sawi zui kha a mak lo, a khungna kha Man United lakah a ni kher bawk a, a ngaihlu hle.

Man United defender Martinez-a'n keeper Aaron Ramsdale-a ball hnek chhuah fuh tawk lo tauh lutin beiseina a siam thar. Erik ten Hag-a nauten point khat hmuh pawh a hlu tih an hria, mahse hun tawp dawnah Nketiah bawk an dang zo lo.

Champion beiseina

Premier League season kal laiah Arsenal hi chawhruala kum naupang ber an ni a, an coach Mikel Arteta pawh kum 40 mi chauh a la ni. Heti chung hian tun dinhmunah chuan team huaisen leh puitling tak an indin thei.

Hun tawp hamrik rik ruala Emirates Stadium boruak khan champion châka an tuihalzia a tifiah. Chak lo se an hmahruaina a derthawng thei tih an hria, chumi hnuah goal an chhuah hmasa leh bawk - a hnu lama an beih let dan erawh team huaisen zia a ni.

Martin Odegaard leh Saka te an tlan tamin an thawkrim a, an ke aṭanga ball chhuak a hlauhawm ṭhin. Goal venhim bakah a sem pawh thiam Oleksandr Zinchenko a hmuhnawm a, a duh huna a tawlh hma zauh ṭhin kha Man United tan a hnawk hle.

Gabriel Jesus a hliam khan a hmunruak luah tur an melh nasa, mahse Hale End chhuak Nketiah an nei miau a, an talbuai rih lem lo. A hun hmasa lama sawisel leh nuihzat hlawh ṭhin Nketiah hi Man United ngam loh khawpa striker hriam a ni mek.

Tihsual vang

Manchester United manager Erik ten Hag chuan an goal chhuah pathum chu tihsual vang a ni tih a sawi a, an chak loh chhan chu a naute chuan inkhelah an rilru zawng zawng an pe tawk lo niah a ngai.

Inkhelh hma khan Ten Hag hian Casemiro tel loa an chak theih thu a sawi, mahse Emirates Stadium-ah erawh point hmuh a harsa. Rashford hi tunlai forward hlauhawm berte zinga mi a ni, mah se striker Wout Weghorst nen bul a ṭantir kha chu a fuh chiah lo.

Dutch striker Weghorst kha 6ft 6in zeta sang a ni a, ball kang an pe tam tura ngaih a ni. Mahse, ball pe tura ngaih Bruno Fernandes leh Christian Eriksen te khan ball an vawrh teh vak lo, an hmanraw hlauhawm tur kha awmze nei loah a chhuak.

Rashford tlan chakna hman ṭangkai an tum viau, counter attack kha an thil tum a ni. Mahse, midfield khaikhawmtu an neih miau loh avangin Rashford pawhin remchang a hmu tam thei lo - Casemiro tel lo chuan a harsa rih a ni.