Mizoramin quartefinal an lut

India ram huap basketball inelna 72nd Junior National Basketball Championship-ah Mizoram chuan quarterfinal an lut. Nimin zing group match inkhel pawimawhah Mizoram hian Uttarakhand chu 88-73 in an hneh.

North East champion Mizoram tan tlang turin chak ngei ngei a ngai. Inkhel pawimawhah Mizoram hian bul an ṭan fuh a, quarter li an khelh zinga pathumah chungnung vekin harsa lutuk loin hnehna an chang.

Bengaluru, Karnataka-a inelna neihah Mizoram hian Uttarakhand bakah hian Delhi chu 88-63 in an lo hneh tawh. Tamil Nadu erawh 88-71 in an hneh lo, an chak loh ṭum hian small forward Lalnunsanga chu a hmui an nghawk thlersak a, group match hnuhnung pawh a khel thei lo.

Mizoram coach H. Lalhruaitluanga chuan, "Lalnunsanga hi kan player pawimawh a ni a, vanduaina a tawk hi pawi ka ti, tun tournament atan chuan a inlan ve theih ka ring tawh lo. Channa lian tak a ni a, chu tih rualin player ṭha dang kan la nei," tiin Vanglaini a hrilh.

Nizan khan group dang ten league round an khel zo chiah a, quarterfinal fixture pawh chhunzawm tur a ni. Chanchinbu buatsaih laiin Mizoramin quarterfinal-a an hmachhawn tur team kan la hre hman lo.