City chakpuitu Haaland - hattrick a siam leh ta!

Manchester City chuan 3-0 in Wolverhampton Wanderers an hneh a, goal thum hi striker chhuanvawr Erling Haaland-a khung vek a ni - Norwegian striker dang thei an awm meuh lo.

Kum 22 mi Haaland hian minute 40-naah goal khung ṭanin, minute 50-naah penalty aṭangin a belhchhah a, minute 54 a thlen meuh chuan hattrick a siam fel der tawh - Premier League hattrick vawi li siam tura match mamawh tlem ber Ruud van Nistelrooy (65) a khum chiang hle.

Haaland hian tun season inelna hrang hrangah match 26 khelin goal 31 a khung tling der tawh a, season hmasaa Borussia Dortmund tana a khung goal 29 aiin a tam tawh zawk.

Red Bull Salzburg aṭanga hming chher striker hian Premier League-ah match 19 khelin goal 25 a khung tawh a, season hmasaa top scorer Mohamed Salah leh Son Heung-min (23 goals) te goal khung aiin a khung tam der!

Mi tuihal Haaland

Manchester City-in tun hnaiah result an nei ṭha tawk lo - an match hnuhnung pathumah vawi khat chiah an chak. League Cup quarterfinal aṭangin Southampton-in an pet chhuak a, Manchester derby-ah an tlawm zui.

Wolves an tawn hmaa an match hnuhnung berah Tottenham Hotspur chu 4-2 in hneh mah se, Spurs hian 2-0 in hma an hruai hman a, second half-ah comeback ropui lantir an mamawh.

Inkhelh zawhah Pep Guardiola lungawi lo a ang a, Spanish coach chuan a player tam zawkin champion chu an ngai neih thu a sawi a, hahdam taka inkhelh an tum chu a hrethiam lo - Haaland erawh a ni ve lo.

Kum thum liam taa Austria Bundesliga nomawi a chawi bak league nomawi la chawi leh lo striker hi champion châkin a tuihal a, goal khung turin engtiklai pawhin a inpeih reng!

Tuihal rehna chu

Haaland-a'n Wolves lakah pawh champion ngei a duh, tih pholangin hattrick a siam leh ta a, season khat chauh a la khel chungin Premier League-ah hattrick vawi li a siam ta der - Liverpool chhuanvawr Salah-a'n English top flight league-a hattrick a siam zat chu a nih rual!

Premier League season khata hattrick siam hnem ber Alan Shearer-a'n vawi nga a siam a, he record pawh hi khum thei dinhmunah a ding mek - league goal 25 ngawt a khung hi, khung belh lo pawh ni se, top scorer nihpui tham a ni tawh.

Salah chuan 2017-18 season khan league match 36 khelin goal 32 a khung a, Premier League season khata match 38 khelh a nih hnua season khata league goal khung hnem ber record a siam.

Mahse, he record pawh hi a derthawng mek. Haaland hian Salah record khum turin goal sarih chauh a mamawh tawh a, match 18 khelh tur a la neih avangin he record hi a khum ngei a rinawm hle.

Haaland, i tan!

Norwegian striker Haaland-a'n goal khungin a hna a thawk mawlh mawlh a, mahse, he striker palian avang hian City game chu a hmuhnawm tawk tawh loa ngai tam tak an awm a, Pep-a system leh Haaland-a khelh dan a inmil loa ngai an tam hle.

Mahse, City boss Pep chuan, "A theihna kan hria a, ani ang neih chuan false nine nena khelh chi a ni lo a, a khelh ṭhat theih dan tura kan inher rem a ngai. A ke bulah a tam thei ang ber ball kan dah a ngai a, player ṭha tak takin an hual vel bawk.

"A goal hmasa ber kha a awmna tur dik taka a lo awm avanga lut a ni a, Kevin de Bruyne ball pek kha a ṭha em em bawk," a ti a, Haaland khelh ṭhat theihna tura an inher rem thu a pha lo.

Pep chuan Haaland sawiselna chu, "An thlir dan a fuh tawk lo ve bawk a ni. A hna atan hian darkar 24 tawp hun a hmang a, a khel chhia emaw, a ṭha emaw, a buai ve ngai lo. Goal a khung hian hattrick engzatna nge, tih leh goal engzahna nge, tih lam ka hre ve ngai lo. Kan team buaina chinfelna a ni a, goal a khung loh erawh chuan team tan buaina a ni," a ti a, a striker a chhan.