Djokovic tan hna a awlsam

Novak Djokovic chuan nimin tlai khan Alex de Minaur chu 6-2, 6-1, 6-2 in a hneh a, darkar hnih leh minute ruk chung lekin hnehna a chang - Australian Open last 16 paltlang turin Djokovic tan hna harsa a awm lo.

Vawi kua ngawt champion tawh Djokovic hian Rod Laver Arena-ah a tir aṭangin inkhel a thunun, a service a hum kim vek thei a ni satliah lo - a khingpui hi break point pawh a hmuhtir miah lo a, vawi ruk ngawt a chhuhsak thung.

Season hmasa khan Djokovic hian Covid-19 vaccine lak duh loh vangin Australian Open hi a khel thei lo, kuminah erawh a vawi 10 nan champion a tum a, Grand Slam title lak hnem lamah Rafael Nadal (22 titles) nih rual theihna remchang a nei bawk a ni.

Nimin tlai inkhel hmuhnawm dangah Tommy Paul chuan Roberto Bautista Agut chu 2-6, 6-4, 2-6, 7-5 in a hneh a, tennis a khelh tawh china Grand Slam quarterfinal a luh vawi khatna a ni - round hmasa lamah Andy Murray a lo hneh tawh bawk.

Pathianni zan inkhelah Stefanos Tsitsipas pawh a chak. Greek tlangval hian set hnih a lak hnuah set hnih bawk a hloh a, darkar thum leh minute 59 zet Jannik Sinner nen an inkhelh hnuah 6-4, 6-4, 3-6, 4-6, 6-3 in a chak hram.

Kum 24 mi Tsitsipas hian Australian Open quarterfinal hi a zawnin vawi thum a lut ta, a vawi khat nan champion a tum ang. Tsitsipas chuan, "Inkhel hautak tak a ni, tennis court chhungah kum tam tak awm ang maiah ka inngai," a ti.

Seeded pathumna Tsitsipas-a'n a hmachhawn leh tur chu Jiri Lehecka a ni dawn. Lehecka hian rin loh tak maiin seeded parukna Felix Auger-Aliassime chu 4-6, 6-3, 7-6 (7-2), 7-6 (7-3) in a hneh. Australian Open hmain Lehecka hian Grand Slam bikah chak ni hmel a la hmu ngai lo.