Newcastle 'thar' tan nomawi?

Carabao Cup semifinal first leg chu zanin hian khelh a ni dawn a, Zanin dar 1:30 hian St. Mary's Stadium-ah Southampton leh Newcastle United te an inkhel ang. Second leg hi February 1, Nilaini zan hian St James Park-ah an khel leh ang.

Semifinal hnuhnung zawkah Manchester United-in Nottingham Forest an hmachhawn dawn a, first leg hi City Ground-ah January 26, Nilaini zan hian an khel thung dawn a ni.

Magpies hian nomawi lian tham hi an chawi teuh ṭhin a, Alan Shearer ho pawhin Premier League-ah pahnihna hial niin FA Cup-ah final hial thleng mah se Premier League awm hnuah nomawi an la chawi lo.

Tualchhung inelnaa Newcastle champion hnuhnun ber chu 1955 a ni a, FA Cup final-ah Manchester City hnehin an champion. Chutihrualin 1969 khan Inter-Cities Fairs Cup-ah an champion a, hei hi Magpies-in nomawi lian tham an chawi hnuhnun ber a ni.

English club hian Saudi Arabia Public Investment Fund zarah nomawi rim nam chho mah se engtikah nge nomawi hmasa ber an chawi ang tih erawh hriatthiam a har. Chutihrualin League Cup semifinal hial an thlen tawh avangin Newcastle tan kum 54 hnua nomawi lian tham chawi theihna hun ṭha a ni thei ang.

Newcastle hian neitu hausa nei mah se sum an la hmang uchuak lo a, chutichung chuan manager Eddie Howe hoin season an hmang ṭha hle. Premier League-ah phei chuan August thla tawpa Liverpool an hneh loh chiah chak loh an la nei a, amaherawhchu FA Cup-ah Sheffield Wednesday an hneh loh avangin an tla tawh thung.

League Cup bikah Newcastle hian first round-a Tranmere Rovers an hneh hnuah Crystal Palace, Bournemouth leh Leicester City te an hneh thei. Premier League club pathum an hneh ṭum hian Howe-a hote hian goal chhuah an nei lo.

November thla khan zanina an khelhna tur St. Mary's Stadium hi Premier League-ah an luhchhuah a, Magpies hian 4-1 ngawtin hnehna an chang. Tun season-a an chet dan hrim hrim leh an inkhelh tawhna thlirin Newcastle buk a rit hle.

Mahse, knockout football-ah chuan engpawh a thleng thei. Saints hian season bul an ṭan ṭhat loh avangin coach Ralph Hasenhüttl an ban a, Nathan Jones hnuaiah an intuai thar mek.

Chutihrualin Premier League bik thlir chuan Saints hian chak an la harsat tho a, an match hnuhnung berah pawh Aston Villa an hneh lo. Mahse, League Cup-ah erawh Saints hi Man City pet tlatu an ni a, inrintawkna sang tak an nei ang.