India chakna Mizo rawlthar

Asian Football Confederation (AFC) Under-17 Asian Cup khel tura inbuatsaih mek India chuan Pathianni khan Uzbekistan U17 nen friendly match an khel a, Mizo rawlthar duhawm Vanlalpeka Guite leh Lalpekhlua ten goal khat ve ve khungin, 2-0 in hnehna an chang.

Vasco da Gama, Goa-a inkhelah hian Lalpekhlua chu Uzbekistan tlarhnung tan a hnawk tluan chhuak zak a, minute 21-naa Uzbek keeper Asilbek Numonov-a'n a chance neih a dansakte chu uiawm tak a ni.

Mahse, India hian goal khung turin an nghak rei lo - captain Vanlalpeka Guite (Sentea) chuan Korou Singh siamsak chu hnai set sawt aṭangin keeper kap karah a pet lut a, Khawzawl rawlthar hian hruaitu nih a tlinzia a pholang nawn.

Uzbekistan tan Abdulkhamid Turgunboev chuan si phurh sutna remchang nei mah se, India bawkin goal an khung nawn a, Korou-a ball cross chu Thanglalsoun Gangte chuan mawi zetin Peka tan a siamsak.

Vengtu nei loa ding Peka hian a class pholangin goal-ah a chantir a, Mizo rawlthar goal hi goal mawi bik huanga dah loh a mawi lo - goal dang lut loin chawlhklawk hman a ni a, second half-ah pawh goal dang a luh loh avangin 2-0 in India an chak.

Mizo rawlthar pahnih telna India U17 hian zanin dar 8:30-ah Uzbekistan U17 nen hian friendly match an khel leh dawn a, hnehna chang leh ngei tura beisei an ni. Indian Football YouTube channel-ah live-in a en theih ang.

AFC U17 Asian Cup 2023 hi May 3-20 inkar hian Thailand-ah khelh a ni dawn a, a sang zual pali chu FIFA Under-17 World Cup 2023 khel turin an tling dawn a, Sente-a captain-na hnuaia khel India an ṭang hle.