A chung berah Barca; Benzema a vul
Pathianni zan Spanish La Liga inkhelah Barcelona leh Real Madrid ten an khingpui ve ve an hneh a, table chung lamah an awm chhunzawm zel - Barca hian match 17 khelh tawhah point 44 an nei mek a, khelh zat inangah Real hian point 41 an nei thung.
Barcelona-in an mikhual Getafe chu 1-0 in an hneh a, Spain international Pedri chuan inkhela goal awmchhun a khung - a chhanletna tur nei lo Getafe-in kut ruakin Nou Camp an chhuahsan.
Spanish Super Cup final-a Barcelona ngam lotu Real Madrid-in La Liga-ah chuan an hmelma kumhlun hi thlah fal an tum lo tih an pholang a, an mikhualna ramah Athletic Bilbao chu 2-0 in an hneh.
Real tan striker chhuanvawr Karim Benzema chuan goal mawi bik a khung a, Toni Kroos chuan minute 90-naah chak nemnghehna goal a khung bawk - Barca an um zel e.
Hei le Barca
Barcelona-in tlarhmaah hrem vangin striker chhuanvawr Robert Lewandowski leh Ferran Torres an chhawr thei lo a, mahse, Catalan club goal nawr a nat loh phah chuang lo.
Minute 35-na lekah Raphinha chuan Barca tana khelh a phu a ni, tih pholan chhunzawmin, Pedri tan ball a thlawh lut a, Spanish midfielder hian inkhela goal awmchhun ni turin a lo khung.
Nipui laia Leeds United aṭanga Barca pantu Raphinha a khel ṭha takzet a, hetihrual hian goal khung lo mah se Getafe tana hnawk tluan chhuak zak Ousmane Dembele hming lam rik loh a thiang lo.
Barca tan bench aṭanga luhtir midfielder Franck Kessie chuan chance duhawm a nei bawk a, mahse, a chhawr lo - a tawpah erawh Barca an chak ta tho a, league nomawi an mitthla ngam ṭan tawh ang.
Vanneihna
Barca-in 68% zet ball chang chungin inkhel an thunun a, hetihrual hian an vanneihna erawh sawi bo bik a thiang chuang lo - relegation zone hlat lo tak Getafe hian Catalan club tlarhnung an rum ṭhaih ve fo.
Pedri back pass sual nangchingtu Borja Mayoral-a'n a chance neih a chhawr lo chu a uiawm a, a hmaa ding German goalkeeper Marc-Andre ter Stegen a paltlang thei tlat lo - Barca-in tun season La Liga-ah goal ruk chauh an la chhuah.
Hun tawp hnaih lamah Juanmi Latasa pawhin chance duhawm a nei ve bawk a, mahse, Real Madrid aṭanga Getafe-a loan-a khel mek striker hian a club nghet Real tan hna ṭha thawhsak thei loin, Ter Stegen bawk a paltlang zo lo.
Barca-in league match riat zet chu a zawnin tlawm an nei ta lo a, Xavi hoin ropui taka indinthar leh an tum mek - Nilaini zan dar 1:30-ah Copa del Rey quarterfinal khelin Real Sociedad an mikhual zui ang.
A hming Benzema
Barcelona chak laia chak loh Real Madrid-in an duh bik lo a, an mikhualna ramah Athletic Bilbao chu 2-0 in an hneh - a tawpa sawi hlawh chu striker chhuanvawr Karim Benzema bawk a ni.
French striker hian minute 24-na lekah goal hmahruai a khung a, goal mawi bik a ni - Marco Asensio ball tauh sual aṭanga ball kal chu Benzema hian a hman thiam loh lam, a ke veilam hmangin mawi zetin a volley goal - kha mah mah, a vei lam lehnghal!
Tun hnaia ram tana inkhelh a chawlhsan thu puangtu Benzema tan league-a goal kua a khungna a ni a, hliamin a tlak buak ve ṭhin avanga inkhel tam tawk lo striker hian tun season inelna hrang hrangah match 18 khelin goal 12 a khung tawh.
Minute 60-naah Benzema hian ṭha zetin Asensio tan a siamsak bawk a, mahse, Spain international hian Ballon d'Or kawl mektu striker siamsak hi goal-ah a chantir thei lo.
A tawp khartu
Real Madrid-in 1-0 in hnehna an chang mai dawn niin a lang a, mahse, Toni Kroos-a'n ngaihdan dang a nei - German midfielder hian minute 90-naah Rodrygo siamsak chu goal-ah a chantir a, 2-0 in an chak.
Bilbao hian inkhelh chhunga chance nei lo an ni bik lo. Mahse, Nico Williams chuan a chance neih duhawm a chhawr lo a, Nico unaupa Inaki Williams chuan goal-a khungah inngai mah se offside vangin pawm a ni lo bawk.
Real tan goalkeeper Thibaut Courtois rintlakzia hmuh turin a awm leh ta bawk a, Spanish club ṭantu tan chuan Belgian keeper an nei thei hi lawmthu sawina tham a ni.
Spanish champion hian January 26, Ningani zan, dar 1:30-ah Atletico Madrid mikhualin, Copa del Rey quarterfinal an khel dawn a, Madrid derby boruak 'hot' khelh hmaa hnehna an chang thei hi an lawm khawp ang.