Goa tan beisei a la bo lo

Pathianni zan Indian Super League inkhelah FC Goa chuan 3-1 in Kerala Blasters an hneh a, match li zet a zawna hnehna an chan zawh tawh loh chu an titawp a, playoff khelh beiseina an nei ve zel bawk.

Goan club tan Iker Guarrotxena, Noah Sadaoui leh Redeem Tlang ten goal khat ṭheuh an khung a, Blasters tan Dimitrios Diamantakos chuan goal khat khung ve mah se awmzia a nei phak lo.

Blasters erawh match riat zet a zawna an tlawm tawh loh hnuah a zawnin match hnih an tlawm ta a, an goal hmasa ber chhuah danah fans an lawm lo bawk.

Goa forward Brandon Fernandes chu Blasters winger Saurav Mandal chuan a lo titlu a, minute 35-naah penalty an chawi - Iker Guarrotxena chuan penalty hi goal-ah a chantir a, Morocco tana vawi li inlan tawh Sadaoui chuan minute 43-naah a belhchhah bawk.

Blasters beiseina siam turin Greece tana vawi nga inlan tawh Diamantakos chuan goal khung ve mah se Redeem Tlang chuan Goa tan a khung ve leh a, South Indian club an tho tawh lo.

FC Goa-in hnehna an chan avangin table-ah pangana an ni a, palina ATK Mohun Bagan chu point khat chauhin an phak lo tawh - match khatin an khel tam zawk thung.

Blasters hi tlawm mah se table-ah pathumna dinhmun an luah mek a, playoff khelh an beiseina a la bo lo. Goa tan Ayush Dev Chhetri chuan inkhel bul a ṭan a, Blasters-in Mizoram player kawl an nei tawh lo thung.

Nizanah ISL inkhel a awm lo a, Nilaini zan thleng Indian top flight league hi an chawl ang - Ningani zan dar 7:30-ah FC Goa hi inlan lehin, East Bengal nen an inkhel dawn a ni.