Dortmund tan English player

Thlasik chawlh neih hnuah Bundesliga an khel ṭan leh ta a, kum 2023 atana round hmasa berah goal 41 tehmeuh a lut. Pathianni zanah inkhel pahnih a awm a, goal sarih luhna inkhelah Borussia Dortmund-in an mikhual Augsburg 4-3 in an hneh a, Bayer Leverkusen-in Borussia M'gladbach 3-2 in an hneh ve bawk.

Signal Iduna Park-ah Dortmund goal hmahruai hi Jude Bellingham khung a ni a, English rawlthar Jamie Bynoe-Gittens-a'n goal a khung ve bawk. Kum 19 mi Bellingham hi chu World Cup-ah England player a nih tawh avangin hriat a hlawh a, kum 18 mi Bynoe-Gittens erawhin hming a chher chho mek.

London-a piang Bynoe-Gittens hian Jadon Sancho hnung zuiin Manchester City aṭangin Dortmund hi a zawm a, tun season ṭantirh khan Dortmund tan goal khung tawhin Augsburg lakah German club tana a goal hnihna a khung.

Zanin hian Bundesliga khelh chhunzawm a ni lehnghal dawn a, champion lai Bayern Munich-in FC Cologne an mikhual dawn. Bavarians hian kumina an match hmasa berah RB Leipzig nen 1-1 in an inhnehtawk a, FC Cologne lakah chak ngei an tum ang.