Tottenham chakpuitu Harry Kane

Harry Kane-a goal khat hmangin Tottenham Hotspur chuan Fulham 1-0 in an hneh a, goal awmchhun khungtu England captain Kane hian Spurs tana goal khung hnem ber Jimmy Greaves (266 goals) a nih rual - a khum ngei ang.

Arsenal leh Manchester City laka an tlawm hnuah Antonio Conte naute an chak ve leh ta a, match 21 aṭanga point 36 hmuin pangana dinhmun an luah, palina Man United chu point thumin an phak lo; match khatin an khel hnem bawk.

Kane leh Goal

Harry Kane hi goal khung thei bik a ni a, chhuak loa Spurs tan a khel zel a nih chuan club tana goal khung hnem ber a ka ni ang tih hi chu mi tam zawk rin dan a ni, tunah chuan record thar siam turin hmabak a nei tlem ta hle.

Spurs tan hian Premier League bikah match 300 aṭangin goal 199 a khung tawh a, inelna hrang hrangah chuan goal 266 a khung tling ta, kum 53 chhung zet mai Greaves-a record lo sawm tawh chu a tluk ta chiah.

Record tluk tur hian Son Heung-min-a ball pek a khung. South Korean international hnen aṭangin ball naran angreng tak a hmu, a hlauhawm laiah la thlain goal zawn lai vel tak a thlen hnuah box pawn aṭangin a thlawh lut.

Second half-ah Kane hian hun remchang ṭha dang a nei, mahse keeper Bernd Leno-a'n a lo dansak bakah, a hun ṭha dang pahnih chu goal ban hrulah a pet chhuak a, record siam nghal theihna remchang a neih chu a chhawr thei rih lo.

Hugo Lloris tan pawh zan duhawm a ni, match hnuhnung pahniha goal ruk chhuahtu hian Fulham lamin an khung tur vawi nga dansakin goal an chhuah lo, nikum October thla hnua a vawi khat nan league match bikah an clean sheet ve leh chiah.

Beiseina chu

Tun hnaia an result ṭha lo chu Tottenham player ten chinfel an duh a, theihtawpin an ṭhat tawk lohna laite an inhrilh tawn niin Kane chuan a sawi a, chumi rah chhuah chu Fulham lakah an chhawr ṭangkai nghal tih a sawi bawk.

Kum 29 mi Kane chuan, "Kan ṭhat dan taka kan khelh leh theih kan thil hrang hrang kan sawi ho. Kan nih tum leh thlen tum kan hlen hman ṭep a, a zawna match hnih tlawm hnua kan chak leh thei ta hi a lawmawm takzet," tiin a sawi.

Kane hian tun season Premier League match 21 aṭangin goal 16 a khung tawh a, season bul a ṭan fuhin a che ṭha hle. Goal khung hnem lamah hian Manchester City striker Erling Haaland (25 goals) chauh tluk loh a nei mek.

Tottenham chak hian manager Conte dinhmun derthawng pawh a ti zia leh deuha ngaih a ni. Conte chuan, "Season hmasa kan hman dan leh kumina kan chet dan hi player-te ka sawi pui a, an rilru put hmangin min ti lawm hle.

"Team ang taka kan thawkho ṭha a nih chuan midang tan hmachhawn kan harsa, mahni tan chauh ni loin midang tana kan khelh hian hlawhtlinna pawh a lo thleng mai ṭhin," tiin a sawi a, hmalam pan thei tura thawhhona ṭha an mamawh thu a sawi bawk.