Arsenal defender thar Jakub Kiwior

Premier League champion tum Arsenal chuan squad an thuam chhah, defender Jakub Kiwior chu Serie A club Spezia aṭangin an lalut, pound maktaduai 17.6 man niin, a contract rei zawng hi kum 2027 thleng daih a ni.

Poland international hi kum 22 mi a ni a, rinrawl tur ni nghal lo mah se Gabriel leh William Saliba te thachhang dawltu a ni dawn a, hmabak nei eng tak zinga mi a nih avangin North London tha ti chak thei tur a ni ang.

Kar tawpa Arsenal leh Manchester United an inkhelh ṭum khan Arsenal sporting director Edu leh Kiwior te hian inkhel an en dun, inbiakna a fel tawh - Thawhṭan zan khan contract an ziah fel thu hi an puang chhunzawm.

6ft 2in a sang defender hian Spezia tan match 39 a khel hman a, European football inelna sangah tawnhriat a la nei tam lo. World Cup-ah khan Poland tan inkhel bul a ṭan kim vek a, an ramah chuan rinrawl zingah a tel phak tawh.

Gunners manager Mikel Arteta chuan, "Jakub Kiwior hi kum naupangte a la ni a, mahse Serie A lamah Spezia tan ṭha taka a khelh bakah Poland tan puitling takin a khel thei tawh bawk, kan tlarhnung lam ti chak thei tur a ni ang.

"Arsenal chuan Jakub Kiwior nena thawhho kan chak tawh a, amah leh a chhungte chu Arsenal chhungkuaah kan lo lawm lut," tiin a player thar a lo lawm a, a lakah beisei a nei sang hle bawk a ni.

Tun thlasik bazar chhungin Arsenal hian Leandro Trossard an lalut fel tawh bawk. Bighton forward hi pound maktaduai 21 man a ni a, kum 2027 thleng daih contract an ziah pui a, kum khat chhung atana pawhsei theih tura tih a ni bawk.

Arteta-a'n squad thuam chak hna hi thawh chhunzawm zel a la tum. West Ham United midfielder Declan Rice an beisei mek bawk a, ani erawh nipui bazar hunah thapui thawha an rim tur a ni thung ang.

England international Rice hi club lian dang pawhin lakluh an duh, chung zingah chuan Chelsea pawh an tel. Mahse, English chanchinbu lian Guardian tarlan dan chuan, midfielder Rice hian Blues aiin Gunners a thlang zawk dawn niin an ziak.