Frank Lampard-a'n West Ham laka Everton a tlawmpui hnu lawkah ban a hlauh loh thu a sawi a, club neitu Farhad Moshiri-a'n thutlukna a kuta a awm loh thu a sawi bawk.
Thawhṭanni zan a thlen meuh chuan Frank Lampard ban thu hriat a ni a, Everton coach a ni tawh dawn lo – player a nih laiin ropui viau mah se, a club hnuhnung pahnih chuan English coach hi an ban ta.
Everton chuan, "Thla 12 chhung theihtawp chhuaha min enkawl avangin Lampard leh a coaching staff te chungah lawmthu kan sawi a ni," an ti a, hmanni lawka an thlawp thu an sawi coach chu an thlah.
Lampard bakah hian a coaching staff Joe Edwards, Paul Clement, Ashley Cole leh Chris Jones te chuan Goodison Park an chhuahsan ve bawk a, Alan Kelly erawh goalkeeping coach angin a cham chhunzawm ang.
A thlawn mai maw
FA Cup third round aṭanga Manchester United-in Everton an petchhuah khan, club neitu Farhad Moshiri chuan coach Lampard leh club director te chungah a rinna a la nghah tlat thu a sawi a, mawlmang taka ring ve ngawt a nih loh thu a sawi bawk.
Moshiri hian, "Kan manager chungah chauh a ni lo, director of football Kevin Thelwell leh board of director te chungah pawh rinna ka nghat bawk – mawlmang taka an chunga rinna nghat ngawt ka ni lo. Everton training ground Finch Farm leh Royal Liver Building (Everton office) a an hnathawh dan te, ruahmanna an neihte hre reng chungin an chungah hian rinna ka nghat a ni," a ti.
Mahse, British-Iranian sumdawng hausa Moshiri-a'n he thu a sawi hnu hian Everton-in league match hnih an khel a, table mawngphah luahtu Southampton chu 2-1 in an ngam lo a, anmahni ang thoa talbuai West Ham lakah 2-0 in an tlawm zui.
Hammers laka an tlawm hnuah Moshiri hi Lampard a ban dawn leh dawn loh zawh a ni a,"Ka thutlukna a ni lo," tiin a chhang – club neitu a ni a, a duh angin thutlukna a siam thei tih chu tlang hriat a ni a, Lampard ṭantute chuan khatihlai khan an hlauthawng tawh.
Mangṭha Lampard
Mahse, fan-te an hlauhthawn lai hian Lampard chuan, "He hna ka chelh thei hi ka inchhuang a, ban ka hlau miah lo," a ti a, mahse, kar thar kan chuan kai meuh chuan Lampard-a'n Everton-ah chanvo a nei ta lo.
Merseyside club hian tun season-ah league match 20 khel tawhin, vawi thum chiah an la chak a, tun season inelna hrang hrangah match 23 khelin, vawi li an chak – league-ah Hammers, Saints leh Crystal Palace an hneh a, League Cup-ah Fleetwood Town an hneh ve bawk.
Tun season-a Everton khelh dan leh result thlirin Lampard ban a ni hi a awm viau a, "An ban dawn em?" tih ai chuan, "Engtikah nge an ban ang?" tih kha rei tak chhung chu zawhna a ni hman – mahse, Lampard hian chhuanlam tur erawh a nei.
Lampard hian, "Season hmasa pawh khan a harsa tawh. Mahse, kan bei a, kan inhamtang a ni. Richarlison kan hralh a, a tel loa awm kan zir. Club dangin hmalam an pan laiin an ruala pen ve tho kan tum a ngai si a ni," tiin Hammers laka an tlawm khan a sawi a, player langsar hralh a, a thlakna neih si loh chu a chhuanlam.
Thawnthu a dang
Player a nih laia fan-ten duat taka 'Super Frankie' tih hminglem an pek hian, player a nih lai chuan player naran tih theih loh tam tak a ti a, nomawi 14 zet a chawi a, English player ropui zingah chhiar tel a ni reng ṭhin.
Mahse, khelmuala inlan player nih leh coaching erawh a dan a dang a, hlawhtlinna thawnthu ngaihnawm tak min hluitu khan coaching lamah chuan inchhuanna tur a nei meuh lo – January 31, 2021-a Everton a enkawl ṭan khan league-ah 16-na an ni a, relegation zone aṭangin point rukin an him.
League match 18 a enkawlah vawi 10 an tlawm a, mahse, Crystal Palace laka 3-2 a an comeback hmangin a team a chhanhim a, an inhamtang hram. Lampard hian May 2018 khan Derby County aṭangin a coaching career a ṭan a, Championship club hi a season hmasa berah Premier League playoff a hruai thleng. Hming a lo chher tawhna Chelsea an lo lang vat a, an legend hi an club-ah an la kir.
Mahse, Chelsea-ah thla 18 chiah a cham hman tihin ban a ni a, Rafael Benitez thlaka Everton a enkawl khan hlawhtling tura beisei ni mah se thla 12 bak a daih chuang lo – match 44 a kaihhruaia a win percentage hi 27.3% chiah a ni.
Tu nge thlak ang?
Everton hian Lampard an ban hnua an match hmasa ber chu Inrinni zan hian an khel dawn a, Premier League hmahruaitu Arsenal an mikhual dawn avangin hna a awlsam dawn lo.
Merseyside club chuan Lampard thlaktu tur hi an zawn nghal tur thu an sawi a, hming ri ring ber chu Leeds United-in an ban tak Marcelo Bielsa a ni – February, 2021-a Leeds-in an ban hnuaha club a la nei leh lo a, MLS club DC United boss Wayne Rooney pawh sawi zingah a tel.
Burnley coach hlui Sean Dyche hming pawh a ri ring viau a, Lampard an rawih hmaa Everton-in an lo ngaihven tawh manager Ralph Hasenhuttl pawh a awl a, November-a Southampton a chhuahsan hnuah club nei loin a awm mek.
October-a West Bromwich Albion a enkawl hnua Baggies din thartu Carlos Corberan hming pawh lam rik a ni a, Leeds-ah khan Bielsa hnuaiah a lo thawk tawh – Everton-in coach thar an lak hma chu Paul Tait leh Leighton Baines ten training an kaihruai ang.