Bale-a'n golf a luhchilh dawn

Hmanni lawka professional football a chawlhsan thu puangtu Gareth Bale chuan golf a luhchilh dawn tih a puang a, PGA Tour event AT&T Pebble Beach Pro-Am-ah a inlan dawn.

Bale hian social media lamah PGA Tour-ah a match hmasa ber a khelh tur thu hi a puang a, "Thla tharah AT&T Pebble Beach Pro-Am ka khel dawn tih hi lawm takin ka puang a ni," a ti.

Kum 33 mi lek ni chunga football khelh chawlhsantu Bale hi footballer a nih lai pawhin golf lama a tuizia tlang hriat a ni tawh a, a bik takin Real Madrid fan-te nen phei chuan an inkar boruak a ṭhat loh phah hle.

Real Madrid tana Champions League nomawi panga chawitu hian, kum 2019 khan Euro 2020 khel tura Wales a tlinpui ṭumin a ṭhiante nen banner thla an lakpui a, he banner-ah hian, "Wales. Golf. Madrid - A pawimawh dan indawtin," tih a inziak!

California-a khelh tur AT&T Pebble Beach Pro-Am-ah hian amateur 156 leh professional 156 an inel dawn a, US Open champion Matt Fitzpatrick, world number 5 Patrick Cantlay leh nomawi ngaihhlut hlawh Masters Tournament, US Open leh The Open Championship-a lo champion tawh Jordan Spieth te chu inlan tur hming langsar an ni.

Bale hian football-ah Southampton, Tottenham Hotspur, Real Madrid leh Los Angeles FC tan khelin, match 553-ah goal 186 a khung a, assist 137 a nei a, nomawi 19 a chawi hman - golf-ah a hlawhtling ve kher ang em, tih chu hunin a la hril ang.