Match khata goal nga khungtu Kylian Mbappe!

Goal khat chauh pawh khung a harsa, chu tih mek laiin Kylian Mbappe tan erawh goal khung chu a hna pui ber a ni mek. Paris Saint-Germain player zingah Mbappe chu match khata goal nga khung thei hmasa ber a ni.

Thawhṭanni zan French Cup round of 32 inkhel club pahnih hi an intiat tawk lo. PSG hi France rama football inelna sang ber Ligue 1 thununtu an ni a, an khingpui Pays de Cassel erawh sixth division club an ni thung - Paris club hi 7-0 teh meuhin an chak.

PSG tan hian Mbappe bakah Neymar leh Carlos Soler ten goal khat ve ve an khung bawk, a khat mawi tawkin mikhual team lamin goal an khung deuh reng tihna a ni a, mualneitu lam tan target zawna vawi khat pet ve zauh bak sawi tur a tam lo.

Brazilian forward Neymar tan World Cup hnua a goal khung lehna hmasa ber a ni a, goal a khung bakah hian Mbappe leh Soler te khung tur a siamsak bawk. Mbappe chuan Neymar goal hi a siamsak ve thung.

Lionel Messi chu hahchawlhna hun pek a ni thung. PSG hian Ligue 1 nomawi chawi an harsat vak lo, French Cup pawh hi a vawi 15 nan champion an tum dawn, an duh ber chu Champions League a ni - UCL huangah Messi a pawimawh ang.

French Cup last 16-ah chuan PSG hian Marseille an hmachhawn dawn, inelna hi February thlatir lama khelh tur a ni dawn. UCL last 16-a Bayern Munich nen an inkhelh hma kara khelh a ni dawn, player an siksawi ngei a rinawm.

PSG manager Christophe Galtier chuan, "Eng inelna pawh ni se, kan khingpui chu eng team pawh ni rawh se kan zah tur a ni. Chuvangin ka player neih ṭhat pawh ka chhawr, kan khingpui khan theihtawp an chhuah avangin fak an phu.

"Hnehna chan ngei tumin kan bei a, goal khat kan khung tawh kha chuan kawng a awlsam phah a, lehlam tan a harsat phah thung. Neymar leh Kylian te inkawp kha duhthusam a ni a, mipui pawhin an hmuh chak ngei chu an hmu," a ti.

France international Mbappe hian PSG tan season kal laia inelna hrang hrangah goal 23 a khung tawh, tun ṭum hi PSG tan captain armband hreng chunga match bul a ṭanna hmasa ber a ni a, a tan chuan a hlu zual ngei ang.

Ligue 1 hmahruaitu PSG hian Pathianni zan dar 1:15 hian league match khel turin Reims an mikhual zui leh nghal dawn a ni.